E atletanan hubenil di Kòrsou ku a kompetí na Carifta Athletics Games 2018, a bolbe kas awe ku 7 medaya. Ku esaki e selekshon a tèrminá na di 6 lugá den e kompetensia. Jamaica a konkistáa 82 medaya i asina gana e kampionato aki.
Carifta Athletics Games a tuma lugá di djabièrnè 30 di mart pa ayera djaluna 2 di aprel na Nassau, Bahamas. Por sierto ku aña pasá e kampionato aki a keda organisá den stadion Ergilio Hato di Sentro Deportivo Kòrsou (SDK) na Brievengat.
Na Bahamas tabatin kompetensia den diferente disiplina manera entre otro korementu riba distansia kòrtiku (sprint), mediano i largu, bula haltu, bula leu, pusha bala, korementu ku obstakulo i tira sper.
Kòrsou a viaha ku un delegashon chikí di atleta hoben atleta pa Bahamas: Vanessa Mercera, Jaden Bernabela, Ramsly Angela, Nasya Ramirez, Glenka Antonia, Gianisa Olbino, Daniel Balentina i Shurianty Mathilda.
Komo hefe di delegashon a viaha tambe pa Bahamas Vanesca Laker, miéntras ku e tim tèkniko a konsistí di Ruthsel Martina (hefe entrenadó), Ariaantje Obispo (asistente entrenadó), Luis Varona Moret (entrenadó) i Charles Fermina (masahista).
E atletanan a konkistá 7 medaya: 1 di oro, 3 di plata i 3 di bròns. Jaden Bernabela a konkistá e úniko oro riba e disiplina bula haltu. Ela bula 2 meter i 8 sèntimer haltu den kategoria di edat 20 aña i mas hóben (U20).
Ramsly Angela a sòru tambe pa bon kosecha. Ela gana 2 medaya: plata den kareda riba distansia 400 meter ku opstákulo (50.75 sekònde) i bròns riba distansia 400 meter plano (47.01 sekònde). Tur den kategoria di edat U20.
Mas aleu Vanessa Mercera a gana plata den disiplina bula haltu (1.71 meter) den kategoria di edat U17. E di tres atleta ku a konkistá medaya di plata ta Glenka Antonia tambe den disiplina bula haltu U20. Ela registrá un bulada di 1 meter i 81 sèntimeter.
E atletanan ku a gana medaya di bròns ta fuera di Ramsly Angela, tambe Nasya Ramirez i Gianisa Olbino. Ramirez a hasi esaki den e disiplina bula leu (5.65 meter) den kategoria di edat U20, miéntras ku Olbino tabata éksito den tirá sper (40.77 meter) den kategoria di edat U17.
Daniel Balentina a tèrminá na di 9 lugá den tira disko U20. Ela tira disko 45.34 meter leu den kategoria di edat U20. Finalmente Shurianty Mathilda a keda na di 6 puesto den e disiplina kareda 800 meter: 2 minüt i 18.35 sekònde den kategoria di edat U20.
Direktiva di Curaçaose Atletiek Bond (CAB) ku ta presidí pa Jurgen Faneyt ta anunsiá ku ta promé biaha den historia ku Kòrsou ta konkistá tantu medaya na Carifta. E delegashon a regresá awe tardi, djamars 3 di aprel, Kòrsou.
