E kampionato lokal beisbòl dòbel A ta kontinuá awenochi, djamars 15 di mei 2018, den Tio Daou Ballpark. Wild Cats Guardian Group/KJ74 i Sta Rosa Indians te ainda ta invikto den e kompetensia. Tur dos tim a gana nan kuater weganan.
Federashon Beisbòl di Kòrsou (Febeko) ta organisá e kampionato di beisbòl den klase superior, esta Liga Aqualectra. Te ku awe tin 15 enkuentro ku a keda efektuá. Ta hunga den Stadion Johnny Vrutaal, Parke Heintje Kool i Tio Daou Ballpark.
E último tres resultadonan ku a keda registrá ta: Groot Kwartier Stars Mangusa vs Fire Birds Citizens Insurance 8-7, Wild Cats Guardian Group/KJ74 vs Royal Scorpions Mr Baseball My Malls 12-7 i Sta Rosa Indians vs Sta Maria Pirates Chippie 4-1.
E enkuentro entre Groot Kwartier Stars i Fire Birds e promé kuater inennan no tabatin kareda. Fire Birds a bai 1-0 dilanti den kabes di sinku entrada, pero Groot Kwartier a bòltu e skor den bòm di mesun turno: 2-1. Tur dos tim a skor 5 kareda den di seis inen i pues ku Groot Kwartier manteniendo e ventaha minimo: 7-6.
Den su di shete turno na bate, Fire Bird ta logra empatá e wega na 7 kareda. E alegria sinebargo tabata di korto durashon, pasobra Groot Kwartier a skor 1 kareda den di 8 alabes último inen pa gana e enkuentro 8-7.
Royal Scorpions parse tabata bai propiná Wild Cats su promé derota dje kompetensia, tumando for di trempan ventaha den e wega i tabata komodo dilanti: 6-2 den tres inen. E aktual kampion sinembargo a kòrta e desventaha anotando 3 kareda den su di kuater turno (5-6) pa finalmente skor 6 kareda den di 7 inen i 1 mas den di 9 pa gana ku skor di 12-7.
Sta Rosa Indians ku 2 kareda den di promé inen, a sigurá e viktoria kontra di Sta Maria Pirates: 2-0. E Piratanan a hinka 1 kareda den di dos entrada (1-2), pero e tim di pariba a bolbe skor 2 kareda den di 5 turno pa amplia su ventaha na 4-1. E enkuentro a tèrminá ku e skor aki.
E kampionato di beisbòl dòbel A ta sigui awenochi den Tio Daou Ballpark ku e wega entre Marchena Braves i Sta Maria Pirates. Esaki ta kuminsá mitar di ocho.