Ozzie Albies su seri di 17 wega konsekutivo batiendo di hit, a tèrminá ayera djaweps 6 di mei den e wega di su tim Atlanta Braves kontra di Seattle Mariners.
E yu di Kòrsou di 29 aña den tres turno na bate no a logra bati hit. Esaki ta nifiká ku e no a kibrá e rèkòrt di su tim komo batiadó konektando hit den 18 wega siguí.
Awor Ozzie Albies ta bateando pa un promedio di .322 punto, ku ta resultado di 47 hit, inkluyendo 8 homerun, den 146 turno na bate. Ku su hitnan ela empuhá 23 kareda pa Atlanta Braves i e mes a skor 29 biaha den e promé mitar di kompetensia di Major League Baseball (MLB).
Seattle Mariners a gana e seri di tres wega kontra Atlanta Braves ku 2-1. E promé i di tres wega a tèrminá ku triunfo pa Seattle Mariners ku skornan di respektivamente 5 pa 4 i 3 pa 1, mientras Atlanta Braves a gana e di dos wega ku skor di 3 pa 2.
Apesar di a pèrdè e seri kontra di Seattle Mariners, Atlanta Braves ta sigui na kabes den divisjon East di National League ku 26 triunfo i 12 derota. Despues di un dia di sosiegu ayera djaweps 7 di mei, e tim di Ozzie Albies ta kuminsá awe djabièrnè un seri di tres wega kontra Los Angeles Dodgers. E tim aki ta na kabes den divisjon West di National League ku 23 wega ganá i 14 derota.
