Sta Rosa Angels Vanddis awor ta solamente un viktoria alehá for di e titulo di kampion den klase superior di sòfbòl femenino lokal. E ekipo a gana ayera, djaweps 26 di oktober 2017, su di dos wega den final kontra di Pichingolo Nissan: 5-2.
E final den klase superior femenino di Curaçaose Softball Bond (CSB) a kontinuá ayera’nochi den Post 6 Ballpark na Rio Canario. Ta trata di un seri ‘best of 5’, esta e tim ku gana 3 enkuentro ta kampion.
E tim relativamente hóben di Sta Rosa Angels Vanddis tras di atrobe lansamentunan di Leonella Elizabeth a gana di Pichingolo Nissan 5-3 i ta dilanti 2-0 den e seri final. E ekipo ta purba awe’nochi pa gana e di 3 wega pa asina bira kampion pa promé biaha.
Den e enkuentro ayera atrobe picher Leonella Elizabeth tabatin bon prestashon riba montíkulo. Den momentonan krusial den e wega ela haña bon yudansa di su kuadro i tambe di bateadónan.
Tabata Angels ku a tuma ventaha den e di dos enkuentro di final: 2-0. Nissan mas despues ta logra riba fayonan den defensa i bateo oportuno sinembargo di empatá e wega: 2-2. Den kabes di 6 entrada Angels ta bolbe kue ventaha despues di un eror i un hit: 5-2.
Pichingolo ta menasá den bòm di mesun entrada number 6, pero entre otro un bunita hugada defensivo entre ‘outfielder’ i ‘catcher’ a evitá kareda. Picher Leonella tambe a pèrtá brasa pa kaba e menasa i mas despues logra su di dos viktoria den final. E triunfo ayera tabata e di 4 konsekutivo ku Sta Rosa Angels Vanddis ta logra riba e eterno kampion Pichingolo Nissan den post temporada.
E seri ta kontinuá awenochi, djabièrnè, ku e di tres enkuentro final den klase superior femenino. Esaki ta planiá pa kuminsá mitar di 10 den Post 6 Ballpark. Promé ku e wega aki, lo kuminsá mitar di 8 ku e gran final den klase superior maskulino entre Dreamteam i Suffisant Eagles.
Foto CSB:
Picher Leonella Elizabeth di Sta Rosa Angels