Sta Rosa Angels Vanddis a bolbe sali kampion di sòfbòl femenino dòbel A di Curaçaose Softball Bond (CSB). E tim tras di lansamentunan di picher Leonella ‘Nela’ Elizabeth awe, djadumingu 7 di oktober 2018, tambe a dominá Pichingolo Nissan pa prolongá su titulo kampionil.

E seri final entre Sta Rosa Angels i Pichingolo a bai kuater wega. Despues ku e kampion a sali gana dos enkuentro ku 5-2 i 3-1, ela pèrdè e di tres wega ku skor di 7-3.

Porsierto ku e di tres wega ei ku a tuma lugá djasabra, Elizabeth no a pichá i pues a haña un dia liber. Lili Granberg tabata bon riba montíkulo pa Pichingolo i a bati bon tambe den e enkuentro aki, kaminda ku Julise Koffi a bati un homerun pa asina a ekipo gana ku skor di 7-3.

Awe djadumingu Sta Rosa Angels a presentá’trobe ku su picher estelar Elizabeth i esaki manera den e promé dos weganan di final a dominá Pichingolo, aunke ku Lili Granberg a dal’é un homerun i empatá wega: 1-1. Despues di esaki Elizabeth no a pèrmití mas kareda.

Den su di kuater turno Sta Rosa Angels ta skor 1 kareda i hasi e wega 2-1. Esaki tabata danki na un hit di Shurvienska Wawoe pa sènter.

Pues picher ganadó tabata Elizabeth, miéntras ku Wawoe a kaba wega ku 2 hit den 3 turno. Angels tabatin 2 kareda riba 5 hit i 0 eror. Pa Pichingolo a pèrdè picher Lili Granberg, miéntras ku Lee-Ann Craangerg a dal 1 hit den 3 turno. Pa Pichingolo 1 kareda, 2 hit i 2 eror.

Angels pues pa di dos aña konsekutivo ta gana Pichingolo pa asina titulá kampion. E aña’ki tambe picher Leonella Elizabeth tabata e faktor determinante den e viktorianan. Ela gana 3 wega den final, kaminda porsierto a tira un ‘one hitter’ i awe un ‘two hitter’.

Den e promé wega final di sòfbòl maskulino, Dream Team a gana ku skor di 9-8 di Suffisant Eagles. Picher ganadó a resultá Fransel Meyers, miéntras ku Nurison Leonora a dal 3 hit den 5 turno na bate.

E seri final maskulino ta sigui mañan djaluna ku e di dos enkuentro. Esaki tambe ta tuma lugá den Buena Vista Ballpark i ta kuminsá 9’or di anochi.