Sta Rosa Angels Vanddis despues di tres wega ta invikto ainda den komienso dje kampionato di sòfbòl femenino fast pitch dòbel A. E tim a gana ayera, djabièrnè 11 di mei 2018, ku skor konvinsente di Demolition Cartel NV: 11-2.
E kampionato nobo di sòfbòl femenino klase superior a kontinuá ayeranochi den Sabana Ballpark. E kompetensia ku Curaçaose Softball Bond (CSB) ta organisá ta dediká e aña aki na Pichingolo KIA/Nissan ku a kumpli 45 aña di eksistensia.
Porsierto ku Pichingolo KIA/Nissan tambe a hunga ayera i a nòkout Nos Tei Office Supply: 13-0. E supkampion di Kòrsou a skor 2 kareda den di dos inen, 6 den di tres entrada i 5 den su di kuater turno na bate. E tim a bati 17 hit i no a kometé niun fayo den defensa.
Picher Arnalda Margaritha a gana e wega sin pèrmití kareda ni hit, pues ela tira un ‘no hit, no run’. Ela ponchá 11 bateadó. Sueni Fundador a resultá e picher pèrdèdó.
Rigmayra Poulina, Anais Piar, Stephany Passial, Merel Oosterveld i Emely Jonis a destaká den kaha di bateo pa Pichingolo. Poulina a bati 3 hit den 3 turno i a empuhá 5 kareda. Piar a dal 2 hit den 3 turno i empuhá 3 kareda, meskos ku Oosterveld. Passial tabata bon pa 2 hit den 2 turno. Jonis a kaba tambe ku 2 hit den 3 turno.
Den e otro wega Sta Rosa Angels a skor 11 kareda kontra Demoliton i pèrmití 2 kareda kontra: 11-2. Picher ganadó tabata Janiska Franklin i esun ku a pèrdè e wega a resultá Celeste Francisca.
Pa Sta Rosa Angels Sueny Felicia, Kimberly Agard, Shurvienska Wawoe i picher Janiska Franklin a destaká na bate. Felicia tabatin 2 hit den 2 turno, Agard a bai di 1-1, miéntras ku Wawoe i Franklin kada un tabatin 1 hit den 2 turno i 2 kareda empuhá.
Picher Celeste Francisca i Louella Manuel tabata e mihó bateadónan pa Demolition. Francisca tabatin un anochi perfekto den kaha di bateo ku 2 hit den 2 turno, miéntras ku Manuel tambe a zwai bon ku su bate: 1 hit den 1 turno.
E kampionato di sòfbòl femenino dòbel A ta sigui awenochi den Sabana Ballpark ku dos enkuentro. Pa mitar di 8 ta topa otro Pichingolo KIA/Nissan i The Fighting Team, miéntras ku pa mitar di 10 ta subi vèlt e timnan Eagles Softex i Nos Tei Curaçao Office Supply.
