Curaçaose Softball Bond (CSB) ta ranka sali djabièrnè, 16 di febrüari 2018, ku kampionato di sòfbòl hubenil. E promé wega dje kompetensia ta bai entre Souax Gil’Sport 1 i Sta Rosa Angels Vanddis 1den Buena Vista Ballpark.
E kampionato di sòfbòl hubenil ta konta ku partisipashon di 5 tim ku ta hunga 4 buelta preliminar, pues na total 16 enkuentro. E kompetensia regular ta durá 10 siman, siguí despues ku e weganan di ‘play-off’.
E 5 ekiponan ku ta kompetí ta: Sta. Rosa Angels Vanddis 1 i 2, Souax Gil’Sport 1 i 2 i Pichingolo KIA/Nissan. Angels 1 ta aktual kampion i Souax 1 e supkampion. E kampionato ta patrosiná pa Maduro & Curiel’s Bank, esta MCB.
E promé wega entre Sta Rosa 1 i Souax 1 ta kuminsá mas òf menos kwartu pasá di 8 djabièrnè anochi, despues dje apertura ofisial. E kampionato ta kontinuá djasabra ku un asina yamá ‘double header’ pa 11’or di mainta i 1’or di tra’i mèrdia entre Souax 2 vs Sta Rosa 2. Miéntras ku 3’or Pichingolo ta enfrentá Souax 1.
E kompetensia ta kontinuá djadumingu ku otro ‘double header’ e biaha’ki entre Pingolo i Sta Rosa 2 pa 11’or di mainta i 1’or tra’i mèrdia. Despues tin 3’or e enkuentro entre Souax 2 i Sta Rosa 1.