E kampionato di beisbòl dòbel A den Liga Aqualectra ta sigui awenochi, djasabra 9 di yüni 2018, ku e wega entre Wild Cats Guardian Group/KJ74 i Sta Rosa Indians. Esaki despues ku último ei Fire Birds Citizens Insurance a gana ku skor di 11-4 di Royal Scorpions Mr Baseball My Malls.
Federashon Beisbòl di Kòrsou (Febeko) ta organisá e kompetensia. Esaki ta keda efektuá den tres stadion: Stadion Johnny Vrutaal, Heintje Kool Ballpark i Tio Daou Ballpark.
Den e último wega ku a keda hungá den Liga Aqualectra, Fire Birds for di promé inen a sigurá su viktoria kontra di Royal Scorpions. E tim a hinka 5 kareda i despues ampliá esaki ku 6 kareda mas repartí den inen tres (1 kareda), entrada sinku (1 kareda) i 4 kareda den su di seis turno. Di nan banda e Skòrpiunnan a skor 1 kareda den tantu di tres komo di kuater inen i 2 kareda den di shete entrada.
E picher ganadó tabata Ronald Bloem. Den 8 inen di trabou ela pèrmití 4 kareda riba 9 hit. Ela ponchá 5 bateadó i duna 2 base por bola. Ludwin Obispo tabatin un anochi perfekto na bate ku 3 hit den 3 turno, di kua 1 homerun. Ela empuhá 4 kareda, skor 2 bia i haña tambe 2 base por bola.
Wild Cats ta kuminsá e enkuentro awemochi ku rèkòrt di 10 triunfo i 1 derota. E Pushinan Brabu den nan último wega a gana ku skor di 7-3 di Marchena Braves. Sta Rosa Indians tin te ainda 8 wega ganá i 3 derota. Por sierto ku den su último kompromiso e tim a keda humiá pa Sta Maria Pirates Chippie: 1-16.
Anteriormente e Indjannan a gana dje Pushinan Brabu, propinando esaki nan pues nan úniko derota te ainda. Pues e konfrontashon awenochi ta bai bira hopi interesante ku Wild Cats purbando di tuma revancha i Sta Rosa tambe no ke kai mas atras. E wega ta kuminsá mitar di 8 den Stadion Johnny Vrutaal na Rif, Otrobanda.