Wild Cats Guardian Group/KJ74 i Sta Rosa Indians ta sigui gana den kampionato di beisbòl dòbel A, esta Liga Aqualectra. E Pushinan Brabu a triunfá ku skor di 8-3 riba Fire Birds Citizens Insurance, miéntras ku e Indjannan a superá Groot Kwartier Stars Mangusa: 8-7.
E kompetensia organisá pa Federashon Beisbòl di Kòrsou (Febeko) a kontinuá awe, djadumingu 3 di mei 2018, ku e dos enkuentronan den Heintje Kool Ballpark.
Wild Cats for di promé inen a tuma un ventaha di 1-0 i ampliá esaki den di tres ku 1 kareda mas: 2-0. Den kabes di shete entrada e kampion di Kòrsou a añadí 2 kareda (4-0), pero Fire Birds a kontestá ku 3 kareda den bòm di mesun inen: 3-4. Finalmente Wild Cats ta skor 4 kareda den su di nuebe turno pa gana e wega ku 8-3.
Picher Sidney Antonia a gana e enkuentro. Ela pèrmití 3 kareda i 5 hit den 6,1 inen di trabou. Ela ponchá 7 bateadó i duna 1 base por bola. Ela keda relevá den di shete entrada dor di Kennimar Martina ku durante 2,2 inen no a pèrmití kareda ni hit.
Raywendley van Gurp i Levi Carolus tabatin un bon dia na bate. Tur dos a bati 2 hit den 3 turno (3-2), ku Carolus empuhando 2 kareda.
Picher Cedeon Langguth a sufri e derota. Durante 6,1 inen ela pèrmití 3 kareda i 5 hit. Ela poncha 2 bateadó i duna 4 base por bola.
Den e otro enkuentro ku a tuma lugá awe djadumingu, Sta Rosa Indians a bini djatras pa gana ku skor pèrtá di Groot Kwartier Stars: 8-7. E Indjannan a skor 3 kareda den promé inen kontra 1 di e Streanan di Kwartier pa tuma ventaha di 3-1. Ela ampliá esaki ku 1 kareda mas den su di dos turno na bate: 4-1.
Groot Kwartier sinembargo a skor 3 kareda den di tres entrada pa asina empatá e wega: 4-4. Ku 3 kareda mas den su di 4 turno e Streanan di Kwartier pa promé biaha a tuma ventaha, aunke ku Sta Rosa tambe a hinka 1 kareda: 7-5. Den di shete entrada tabata e Indjannan ku a bolbe skor 3 kareda i gana e wega ku skor di 8-7.
Picher Marc Hennep ku a drenta di relevo den di seis inen, a gana e wega pa Sta Rosa. Ramses Jamanika a kuminsá riba montíkulo i a pèrmití 7 kareda i 10 hit den 4 inen di trabou. Ela keda relevá pa Guisonne Sambo ku despues a traha lugá pa Hennep. Marvin Ludowika tambe a mira akshon i a salba e enkuentro.
Derrick Francisca a resultá e mihó bateadó pa Sta Rosa Indians. Ela bati 2 hit den 5 turno na bate i a empuhá 4 kareda.
Djasabra anochi tambe tabatin wega den Liga Aqualectra. Sta Maria Pirates Chippie no tabatin kompashon ku Royal Scorpions Mr Baseball My Malls: 18-0. Despues di tres inen ya e Piratanan tabata ganá 12-0.
