Wild Cats Guardian Group/KJ74 ta bai purba gana su di 6 wega sin derota den promé buelta dje kampionato di beisbòl dòbel A lokal, esta Liga Aqualectra. E kampion di Kòrsou ta hunga awenochi, djasabra 19 di mei 2018, kontra Sta Rosa Indians.
Federashon Beisbòl di Kòrsou (Febeko) ku Micheline Heyliger komo presidente di direktiva, ta organisá e kompetensia di beisbòl. E kampionato ta keda hunga den tres stadion: Stadion Johnny Vrutaal, Parke Heintje Kool i Tio Daou Ballpark.
Wild Cats ta e úniko ekipo ku ainda no a pèrdè den Liga Aqualectra. E kampion di Kòrsou a gana porsierto djaweps ei ku skor konvinsente di 12-1 di Groot Kwartier Stars Mangusa. E wega aki a tuma lugá den Tio Daou Ballpark na Noord Zapateer.
Picher Ruderly Manuel a bai e ruta kompleto pa Wild Cats. Den 8 inen e tabatin solamente 96 lansamentu, di kua 70 straik i ku ta indiká ku e tabatin pues tremendo kòntròl. Ela pèrmití solamente 1 kareda i 5 hit, ponchá 9 bateadó i duna 1 base por bola.
E ofensiva dje Pushinan Brabu tambe tabata tremendo. E bateadónan a bati 8 hit, bou di kua 2 homerun. Esakinan tabata pa kuenta di Rojean Cleofa i Randolph Kirindongo. Cleofa a kaba e wega ku 1 hit den 4 turno i 3 kareda empuhá, miéntras ku Kirindongo tabata bon pa 2 hit den tambe 4 turno i 2 kareda empuhá. Yurendell de Caster tambe tabatin un bon anochi na bate ku 2 hit den 3 turno i 2 kareda empuhá.
Esaki ta e di sinku viktoria pa Wild Cats den e promé buelta di Liga Aqualectra. E kampion di Kòrsou no a pèrdè niun wega ainda i ta hunga awe nochi kontra di Sta Rosa Indians, ku ta okupá e di dos lugá riba tabla di posishon ku 4 triunfo i 1 derota.
Porsierto ku e úniko wega pèrdí aki e Indjannan di Sta Rosa a sufri djarason tras di lomba. Tabata e tim di Fire Birds Citizen Insurance ku a sòru pa esaki i asina haña number di kas. E wega’ki a kaba ku skor di 6-3. Riba djamars tabata Sta Maria Pirates ku a gana ku skor di 6-5 di Marchena Braves.
E enkuentro di awenochi entre Wild Cats i Sta Rosa Indians ta kuminsá mitar di 8 den Stadion Johnny Vrutaal na Rif, Otrobanda.