Xaverianen a sòru pa un sorpresa den e promé wega di semi final klase A femenino di Federashon Vòlibòl Kòrsou (Fevoko). E tim presisamente ayera, djaluna 1 di aprel, a laga Stakamahakchi atras komo ‘April Fool’: 2-1.
Fevoko a kuminsá ayera djaluna den sala Errol Rooi di Sentro Deportivo Kòrsou (SDK) ku e semi final den klase A femenino. Pues tabatin dos wega riba programa.
Por sierto ku Staka a terminá komodo na promé puesto den kampionato regular di klase A ku 10 triunfo i 2 derota. E tim tabata faborito tambe pa gana e promé wega di semi final i a sali gana e promé sèt 25-18.
Xaverianen a terminá e bueltanan preliminar dje kampionato dediká na baluarte Dito Ravenstein, na di kuater posishon ku solamente 3 viktoria i 9 derota. Despues di a pèrdè e promé sèt, e tim a empatá e wega ganando e di dos sèt ku relativo fasilidat: 25-16.
Den e di tres sèt Xaverianen tabata hopi motivá i a sorprendé Staka i fanátikonan ganando ku skor konvinsente di 15-4. Ku e triunfo aki e tim a pika dilanti 1-0 den semi final.
Den e otro wega di semi final Shuatanari ku a tèrminá na di dos puesto den e buelta preliminar, a gana ku skor di 2-0 di number 3 Hurricane. E parsialnan tabata 25-16 i 25-16.E semi final den klase A femenino ta sigui djadumingu, miéntras ku mañan anochi (djarason 3 di aprel) tin e di dos wega den final klase A maskulino entre Warwarú i Watakeli. Den e seri aki Warwarú ta 1-0 dilanti.