FC Securitas Antias ayera, djasabra 21 di aprel 2018, a gana su di 5 enkuentro den divishon B dje kampionato lokal di futsal. E tim asina a konsolidá su posishon na kabes ku 11 punto: 5 triunfo i 1 empate. Den divishon A FC San Lucas i FC FCF ta kompartí e promé lugá ku 8 punto.
Na e momentonan aki Futsal Federation Curaçao ta organisá e bueltanan preliminar dje kampionato di futsal di Kòrsou. E kompetensianan den divishon A i B ta keda hungá den sala Niels Liberia di stadion Odulio Willems den Suffisant. Den wikènt tabatin atrobe diferente enkuentro den tur dos divishon.
Den divishon B FC Securitas Antias a gana ku skor di 3-1 di FC Sta Helena. E golnan di Securitas a keda di skor den e promé tempu. E goleadónan tabata Quincy Wilson (2) i Bryan Dorothea. Pa e tim pèrdèdó Gunnarson Schoop a hinka gol.
Den otro wega den divishon B ayera djasabra Sta Rosa Stars a superá FC Ocean View Elite ku skor di 4-1. Na sosiegu e skor tabata 2-0. Jurensley Martina tabata e hòmber grandi pa Sta Rosa ku 3 gol. Norman Hoyer tambe a skor pa e tim ganadó. Roelton Girigorie a salba honor pa Ocean View.
Den divishon A Ocean View FC a gana ayera djasabra ku skor di 3-1 di FC Don Bosco. Tur e golnan a keda di skor den di dos tempu. Stallone Isenia tabata dos biaha éksitoso, miéntras ku Rayson Koeiman tambe a hinka gol pa e tim ganadó. Oscar Seco Vegas a skor pa Don Bosco.
E otro resultadonan dje weganan ku a keda hungá djabièrnè den divishon A ta: FC Babranis 01 vs FFCE United FC 2-3 i FC FCF vs FC RO Family 3-2. Den divishon B: FC Celestial Boys vs FC Babranis 02 0-3.
E resultadonan dje enkuentronan riba djaweps den divishon A: Pantera Negras vs FC IGA 3-4. Divishon B: Dòmi vs FC Bandolino 4-3 i Fabarma FC vs FC Five Stars 3-1.
