Xaverianen a logra su di 7 viktoria awe, djadumingu 25 di febrüari 2018, den klase superior maskulino di Federashon Vòlibòl Kòrsou (FeVoKo). E tim a superá Stakamahakchi ku skor di 3-1. Den klase superior femenino Stakamahakchi a sigui ku su racha viktorioso ganando tambe di Hurricane: 3-0.
FeVoKo a kontinuá awe ku e kampionato regular den klasenan superior. Tabatin kuater enkuentro den sala kubrí Errol Rooi di Sentro Deportivo Kòrsou (SDK) na Brievengat.
Den kategoria femenino Stakamahakchi a gana su di 8 enkuentro i te ainda ta invikto den e kampionato. E tim a pasa ku skor di 3-0 riba Hurricane: 25-21, 25-19 i 25-17.
Den e otro enkuentro femenino Shuatanari a pasa ku skor tambe di 3-0 riba Green Jewels. E parsialnan tabata: 25-14, 25-15 i 25-11.
Den klase maskulino Xaverianen a dal Stakamahakchi 3-1: 25-22, 25-15, 20-25 i 25-19. Den e otro enkuentro Watakeli a sali komo vensedor riba Green Tigers: 3-0. E parsialnan tabata: 25-23, 25-17 i 25-16.
