E yunan di Kòrsou Didi Gregorius i Andrelton Simmons tin ku buska otro tim pa hunga aden den Major League Baseball (MLB). Promé tabata Philadelphia Phillies ku djaweps a yama Gregorius danki i despues Chicago Cubs djasabra tambe a bisa Andrelton ku no ta sigui ku ne.
Phillies den un seri di kambio a disidi na laga Didi Gregorius liber, esta e yu di Kòrsou di 32 aña a tende ku no tin lugá mas pe den e tim. Na e momento ei e tabatin un promedio di bateo di 210, ku 1 homerun i 19 kareda hinká aden ku su hitnan.
Esaki tabata di tres temporada di Gregorius ku Philadelphia Phillies. Den e tres añanan aki ela bati pa un promedio di 230 ku 24 homerun i 113 kareda empuhá.
Apenas e notisia di Didi Gregorius a bira konosí i a sorprendé hopi fanátiko na Kòrsou, Chicago Cubs djasabra tambe a anunsiá di ta laga Andrelton Simmons liber. Aki e tim a aktivá e yu di Kòrsou di 32 aña ku tabata riba lista di hungadónan leshoná, pa mesora bisa di ta lage liber.
Simmons e aña aki a hunga solamente den 34 wega pa Chicago, despues ku ela firmá ku e tim. Su kontrato tabata di 4 mion dòler pa e temporada aktual. Ela bati pa un promedio di 173 I tabata sufri di un leshón na su skouder drechi.
