Dimitri Leon ta e kampion nobo di tènis di mesa den kategoria ‘Senior’ di Kòrsou. Ela kita e korona ayera, djabièrnè 24 di novèmber 2017, for di Michael Dalnoot: 4-1. Den kategoria ‘Masters 50+’ tabata Hensley Wentwoord ku a titulá kampion.
E kampionato di Kòrsou di tènis di mesa 2017, a yega su fin djabièrnè ku weganan final den tur kategoria, entre otro ‘Senior’ i ‘Masters 50+’. Direktiva di Federashon Tènis di Mesa Kòrsou (FTMK) por mira tras riba éksitoso kompetensianan den Sentro Irene Moreno.
Tantu Dalnoot komo Leon a klasifiká invikto pa final di ‘Senior’, ku ta e klase superior di FTMK. Dalnoot ku tabata kampion 2016 den bueltanan preliminar a gana di Jacinto Zimmerman (3-0: 11-9, 11-7 i 11-5), Raymond Begina (3-0: 11-8, 11-7 i 11-4). Den kwart final e kampion di Kòrsou a derotá Sigmar Carmelia tambe den 3 sèt strit (3-0: 11-9, 11-8 i 11-8) i den semi final ela gana di Henny Metry ku 3-1: 7-11, 12-10, 11-9 i 11-4.
Leon tambe a hunga tremendo preliminar sin pèrdè. Ela gana di Asish Amrish (3-0: 11-4, 11-1 i 11-6), Lucien Alberg (3-0: 11-0, 11-0 i 11-0) i di Sigmar Carmelia (3-1: 11-6, 11-5 i 4-11 i 12-10). Den kwartfinal Leon a triunfá ku 3-0 riba Raymond Begina: 11-4, 11-5 i 11-6. Den semi final ela superá Devon Meilink ku 3-1: 8-11, 11-9, 13-11 i 11-7.
Den final Leon a sali gana e promé dos sètnan i asina tuma un ventaha komodo di 2-0: 11-1 i 13-11. Dalnoot a logra gana e di tres sèt despues di un lucha tenás ku 15-13 i asina hasi e wega 1-2. Sinembargo Leon a rekuperá bèk i gana e di kuater sèt ku 11-1. E di sinku sèt tambe a keda hungá i esaki tambe Leon a gana: 11-4. Ku e viktoria aki ela konkistá e titulo kampionil, kitando e korona for di Dalnoot.
Den kategoria ‘Masters 50+’ Hensley Wentwoord a topa ku Ronaldi Vos den final. E konfrontashon aki a bai 5 sèt ku kada hungadó ganando pa turno un sèt di otro.
Vos a gana e promé sèt ku skor di 11-7 i bai 1-0 dilanti. Wentwoord ta empatá e wega 1-1 ganando e di dos sèt ku 11-5. Vos den di tres sèt ta bolbe tuma ventaha ganando ku 11-9. Ku e mesun skor aki Wentwoord ta gana e di kuater sèt pa hasi e wega 2-2. E di sinku i alabes último sèt mesun Wentwoord ta gana ku 11-4 pa asina konkistá e titulo di kampion.
