Centro Dominguito a sufri awenochi, djadumingu 3 di yüni 2018, un derota literalmente den pitu kontra Jong Holland. Ora ku mayoria fanátiko a kere ku e wega ta terminá empatá na 2 gol, Dwaylon Maria den tempu di leshon ta hinka e di 3 gol pa e tim trikolor gana dje aktual kampion di Kòrsou.
Ku e resultado aki kosnan a bira hopi mas kayente den ‘Kaya 6’. Esaki ta e promé serie di weganan pre-final entre 6 tim den promé divishon di Federashon Futbòl di Kòrsou (FFK), esta Liga MCB.
Aunke ku Jong Holland a klasifiká anteriormente pa e sigiuente play-off, mihó konosí komo ‘Kaya 4’, tòg e tim a hunga pa gana awe. E ekipo trikolor ku a terminá komo kampion di kampionato regular, a habri skor na apenas 2 minüt di wega via di Jurensley Martina: 1-0.
E alegria serka Jong Holland sinembargo tabata di korto durashon, pasobra seis minüt despues Centro Dominguito ta empatá e enkuentro. Esaki via di un pinalti ku Ivanny Calvenhoven no a faya. Sinembargo un otro pinalti na di 47 minüt a pone e tim trikolor atrobe dilanti. Sebastian Londoño a skor: 2-1. Na di 61 minüt Geryon Alberto ta sòru atrobe pa hasi e wega pareu: 2-2.
Ora ku mayoria fanátiko a kere ku e partido ta bai tèrminá empatá na 2 gol, Dwaylon Maria ta sorprendé e kiper i fanatikada di Centro Dominguito den tempu di leshon: 3-2 pa Jong Holland. Esaki ta nifiká ku e tim trikolor awor tin 10 punto for di 4 wega, miéntras ku Centro Dominguito ta keda ku 3 punto den tambe 4 enkuentro.
E derota ta trese ku ne ku awor Centro Dominguito i Union Deportivo Bándabou ta den lucha pa klasifiká komo e di kuater ekipo pa ‘Kaya 4’. Tuir dos tim tin 3 punto. Undeba ta hunga kontra Inter Willemstad riba djabièrnè 8 di yüni, miéntras ku Centro Dominguito riba djasabra 9 di yüni ta topa ku Skèrpènè.
