Sta Rosa Angels Vanddis a kuminsá e kampionato nobo di sòfbòl femenino dòbel A ku dos triunfo. E kampion di Kòrsou a gana su wega inougural ku skor di 5-2 di Pichingolo Nissan i despues ela bati Nos Tei Curaçao Office Supply 11-1.
E kampionato organisá pa Curaçaose Softball Bond (CSB) a ranka sali djabièrnè den Sabana Ballpark na Noord Zapateer. E kompetensia ku e aña aki tambe ta patrosiná pa MCB, tabatin un bunita apertura ku shownan di PCD Brassband i grupo di baile D’Art.
CSB ta dediká e kampionato nobo di sòfbòl femenino Dòbel A na kuater baluarte: Gilbert Paulina (umpire), Sylvanie Clarck (èks sòfbolista), Jozeph Martina (èks sofbolista) i Gilbert Jansen (èks dirigente). E kuarteto aki a efektuá e apertura ofisial dje kompetensia. Heidi Angelista a kanta himno di Kòrsou, miéentras ku Richard ‘Chati’ Constancia di Sabana Ballpark a fungi komo maestro di seremonia.
E wega inougural a bai entre kampion Sta Rosa Angels Vandiss i supkampion Pichingolo Nissan. E enkuentro a kuminsá ku un ‘dead ball’ di picher estelar Leonella Elizabeth di Angels pa e promé batiadó di Pichingolo, ku despues a skor tambe e promé kareda dje kampionato: 1-0.
Pichingolo no por a defende e ventaha minimo aki, aunke ku picher Arnalda Margaritha a kuminsá ku bon kòntròl. Angels durante e wega a logra empatá i despues bai dilanti pa gana ku skor di 5-2.
Elizabeth a resultá picher ganadó, miéntras ku Suheydi Faneit i Deidra da Costa Gomez a dal 2 hit den 3 turno pa Sta Rosa Angels ku tabatin 5 kareda riba 7 hit i 1 eror. Margaritha a pèrdè e wega, miéntras ku Tsade Joubert a destaká na bate ku tambe 2 hit den 3 turno pa Pichingolo ku a tèrminá ku 2 kareda riba 6 hit i tambe 1 eror.
E kompetensia a sigui djasabra i djadumingu ku tres enkuentro mas den Sabana Ballpark.
Eagles Softex a gana ku skor di 6-4 di Nos Tei Curaçao Office Supply. Yetsely Helmijr a resultá e picher ganadó. Susmailine Rifaela a sobresalí na bate ku 2 hit den 3 turno pa Eagles ku tabatin 6 kareda, 4 hit i 0 eror. Picher Tafary Janga a sufri e derota pa Nos Tei, miéntras ku e tim no a bati niun hit i a kaba ku 4 kareda, 0 hit i 5 eror.
Fighting Team a superá Souax Gill’Sport ku skor di 9-7. E wega aki a bai 8 inen. Picher Lee-Ann Craanberg a gana e wega, miéntras ku Ruthsainy Calmera i Solange Soliana a bati kada un 2 hit den 3 turno pa Fighting Team ku tabatin 9 kareda, 12 hit i 7 eror. Dayanara Pietenella tabata e picher pèrdèdó miéntras ku Ivaniela Belfor a destaká na bate ku tambe 2 hit den 3 turno pa Souax ku a registrá 7 kareda, 6 hit i 6 eror.
Finalmente Sta Rosa Angels a bolbe mira akshon den wikènt i a gana su di dos wega, superando Nos Tei Curaçao Office Supply ku skor grandi di 11-1. Janiska Franklin a resultá e picher ganadó, miéntras ku Deidra da Costa Gomez i Shariray Floranus kada un a dal 2 hit den 2 turno. Pues Da Costa Gomez tabatin un tremendo wikènt na bate ku 4 hit den 5 turno den dos weganan di su tim.
Picher Celeste Francisa a karga ku e derota. Richaida Hassel a sobresalí den bateo ku 1 hit den 1 turno pa Nos tei, ku tabatin pues 1 kareda, 2 hit i 2 eror. Sta Rosa Angels a registrá 11 kareda, 9 hit i 1 eror.
Den klase A tabatin dos wega. Vipers Elite a gana ku skor di 6-3 di Souax Gill’Sport. Picher ganadó tabata Lisandra Ursulita, miéntras ku Lishandley Ursulita a dal 2 hit den 3 turno.
Den e di dos wega den klase A Sta Rosa Angels Vanddis a superá Dream Girls ku skor di 9-8. Picher Darlyse Salesia a gana e enkuentro aki, miéntras ku Danisha Salesia i Maribela Janga kada un a bati 2 hit den 3 turno.
Cover photo: Picher Leonella Elizabeth
