Dreamteam ayera, djamars 31 di oktober 2017, a bolbe titulá kampion sòfbòl maskulino klase superior. Asina aki e ekipo a prolongá e titulo kampionil. E tim a gana tambe e di tres wega dje seri final kontra di Suffisant Eagles: 6-1.
Curaçaose Softball Bond (CSB) por mira’tras riba un tremendo kampionato maskulino ku ayera a yega su fin ku e seri final. E enkuentronan a tuma lugá den Post 6 Ballpark na Rio Canario.
Dreamteam no a laga niun duda di tabata e mihó ekipo maskulino i den final a pasa 1, 2, 3 riba Suffisant Eagles den e seri ‘best of 5’. Pues e tim no a pèrdè niun wega den final i pa di dos aña konsekutivo ta gana e titulo.
Den e di tres wega final atrobe picher Frensel Meyer tabata tremendo riba montíkulo pa Dreamteam. Ela pèrmití solamente 1 kareda i 2 hit na Suffisant Eagles, miéntras ku ela tira 9 ponche. Por sierto ela keda skohé komo hungadó mas balioso dje final. Den 12 entrada di trabou e picher estelar a ponchá 21 bateadó.
E mihó bateadó den e di tres wega final a resultá Richeron Michel di Dreamteam. Ela dal 2 hit den 3 turno. Picher pèrdèdó tabata Alexander Rodriquez.