Suffisant Eagles ayera, djaluna 23 di oktober 2017, klasifiká pa final di sòfbòl den klase superior maskulino. Den forma dramátiko e tim a gana den último entrada dje di tres alabes enkuentro desisivo den semi final di Harlem Power: 7-6.
For di komienso Suffisant Eagles tabata mustra di bai gana e wega i semper tabata dilanti den skor. Sinembargo Harlem Power den fase final di wega, di 5 entrada, a logra empatá i pa promé biaha asta bai dilanti: 6-5.
E alegria tabata di korto durashon serka Harlem Power, pasobra Suffisant Eagles e sigiuente turno na bate a dal duru bèk. Kampion bate di kampionato regular Alexander Rodrigues a bati e bala den ‘centre field’ pa empatá e wega 6-6. E sigiuente bateadó kende tabata Juruengelo Tielman tambe a bati e bala leu den mesun ‘centre field’ ku a nifiká e kareda di viktoria pa Eagles.
Alexander Rodrigues a terminá komo picher ganadó, miéntras ku e mes tambe tabata e mihó na bate ku 2 hit den 3 turno, inkluso un homerun. Rafael Gonzales Williams a resultá picher pèrdèdó, miéntras ku e mes tambe a kaba komo mihó bateadó ku 2 hit den 3 turno.
Sifranan final di Suffisant Eagles: 7 kareda, 11 hit i 1 eror. Harlem Power: 6 kareda, 6 hit i 1 eror.
Ku e viktoria dramátiko ei, Suffisant Eagles a klasifiká pa final kaminda elo hunga kontra Dream Team. E seri aki ta ranka sali djabièrnè awor pa mitar di 8 di anochi den Post 6 Ballpark na Rio Canario.
Un dia promé, esta djaweps anochi 8or, e seri final den klase superior femenino entre Sta Rosa Angels Vanddis i Pichingolo Nissan ta kontinuá den Post 6 Ballpark na Rio Canario. Angels ta 1-0 dilanti.