Excel ayera, djasabra 30 di mart, a bin djatras pa gana den un wega emoshonante di Janwe Spartacus: 74-73. Apesar ku Jonatan Mercera a skor no menos ku 34 punto, e no por a evita e derota di su tim. E wega aki den kategoria U20 tabata un bon propaganda pa e deporte di basketbòl.
Curaçao Basketball Federation (Cubafe) e siman tras di lomba a ranka sali ku e kampionato lokal di basketbòl. Ayera djasabra tabatin wega den tur kategoria den sala Errol Rooi di Sentro Deportivo Kòrsou (SDK) na Brievengat.
Sigur e enkuentro entre Excel i Janwe Spartacus den kategoria U20 a hala mas tantu atenshon. Esaki no ta straño komo ku aña pasá Excel a konkistá e titulo i pues ta aktual kampion, miéntras ku Spartacus ta supkampion.
E dos timnan a trit e públiko den sala Errol Rooi un tremendo wega ku hopi tenshon i emoshon. Den e delaster kuartu di tempu Excel a logra bini for di un desventaha di 10 punto i faltando 3 sekònde a logra gana e enkuentro pèrtá 74-73.
Un nota remarkabel ta ku defensa di Excel tabatin hopi dolor di kabes ku Jonatan Mercera di Spartacus. Ela skor no menos ku 34 punto pa su tim ku apesar di esaki a pèrdè pues. E tin awor 51 punto den dos wega komo ku den e enkuentro inougural di su tim kontra di Royal Hoops, ela skor 17 punto pa Spartacus gana 62-59.
Pa Excel Julio Espinal tabata esun ku mas punto di skor: 28. Christopher Reinilia tambe tabata hopi presis den su tirunan ku 26 punto. Pues huntu e duo aki a skor 54 dje 74 puntonan dje tim kampion.
Den e promé seri di wega di kampionato den kategoria U20, e timnan Excel i Willemstad Warriors tin 1 triunfo sin derota. Janwe Spartacus tin 1 viktoria i 1 derota, miéntras ku Sharks i Royal Hoops kada un tin 1 wega pèrdí den 1 enkuentro hungá te ainda.
Den kategoria Senior tambe tabatin wega ayera djasabra 30 di mart. Curaçao Trotters a gana ku skor di 69-58 di Montaña Spartans. Knijel Inees tabata topscorer pa Trotters ku 24 punto. Wilkin Rosario di Spartans a skor 23 punto.
Den kategoria U10 Spartacus a gana di Sharks ku 38-18. Gianni Scholsberg di Spartacus a sobresalí ku 14 punto, miéntras ku pa Sharks e topscorer tabata Hardic Kripalani ku 9 punto.
Sharks den kategoria U12 a gana ku skor di 21-10 di Spartacus. Edien Sommer i Szean Every di Sharks a skor kada un 6 punto, miéntras ku Nelson Perez di Spartacus tambe a skor 6 punto.
Den kategoria U14 tabata Spartacus ku a gana ku skor di 58-4 di Sharks. Julian Vivas tabata topscorer ku 23 punto, miéntras ku su kolega di tim Jean-Pierre Pirela tambe tabata den gran forma ku 18 punto.
E wega den kategoria U16 sí no a sigui. Spartacus a gana esaki pa default di Warriors: 20-0.
