FC Securitas Antias ta sigui gana den divishon B di Futsal Federation Curaçao. E tim ta úniko invikto i awor a tuma distansia di 3 punto for di sobrá ekiponan. Den divishon A FC Babranis 01 a pasa pa komandá e tabla di posishon.
E kampionato di futsal lokal ta konsistí di kompetensia den tantu divishon A komo divishon B. E weganan ta keda hungá den sala Niels Liberia di stadion Odulio Willems den Suffisant.
FC Securitas Antias ayera djaweps a registrá su di kuater viktoria den e kompetensia den divishon B. E tim a gana ku skor di 3-1 di Fabarma FC. E golnan di FC Securitas Antias a keda di skor pa Quincy Wilson, Jean-Luis Fortin i Farlison Wilson, miéntras ku Athwall Felipa a salba honor pa Fabarma FC.
Den e otro enkuentro den divishon B, FC Babranis 02 a gana ku skor di 4-2 di Excellent. Esaki tabata e promé triunfo pa Babranis 02. Alzinho Costina, Swendy Sambo i Jonathan Zimmerman a hinka gol pa e tim ganadó, miéntras ku tambe tabatin un outogol di Sharrion Pietersz di Excellent. Mas aleu Rayshenel Justiana i Joel Martina a hinka gol pe ekipo pèrdèdó.
E resultadonan ta nifiká ku FC Securitas Antias awor tin 9 punto fot di 5 enkuentro: 4 triunfo i un empate.
Den divishon A FC Babranis 01 a pasa komandá e tabla di posishon despues di a gana ku skor di 2-1 di FC FCF. E golnan dje tim ganadó a keda hinká pa Maikel Pinedo, miéntras ku Davidson Rosa tabata eksitoso pa e ekipo pèrdèdó.
E triunfo ta nifiká ku awor FC Babranis 01 tin 7 punto for di 5 enkuentro: 3 viktoria, 1 empate i 1 derota.
