The Fighting Team a gana su dos weganan den kontinuashon dje kampionato di sòfbòl fast pitch. Esakinan tabata ku skor di 8 pa 3 riba Pichingolo i 7 pa 0 riba Fenix Softex. Porsierto ku e picher Libis Hurtado Payares a gana tur dos enkuentro i tirando asta un no hit, no run riba Fenix.
Curaçaose Softball Bond (CSB) a sigui den wikènt tras di lomba ku vários wega den divishin máksimo di sòfbòl femenino, esta den Liga MCB-CSB.
Tabata Libis Hurtado Payares ku den su debut pa The Fighting Team a sobresalí. Primeramente ela dominá e batiadónan di Pichingolo pa yuda su tim gana ku skor di 8 pa 3.
The Fighting Team a skor 8 kareda riba 6 hit i no a hasi fayo den su defensa. LeeAnn Craanberg i Ruth-shainny Calmera a karga e tim ku nan bate. Tur dos a bati 2 hit den 2 turno. Pichingolo tabatin 3 kareda riba 5 hit i 2 eror. Picher pèrdèdó tabata Morina Rosa, miéntras ku Ciröendra Peloz tambe tabatin un dia perfekto na bate ku 3 hit den 3 turno.
Despues dje triunfo riba Pichingolo, Libis Hurtado Payares a bolbe mira akshon riba montíkulo kontra Fenix. Entre tantu ela aklamatisá i tabata perfecto, lansando un no hit no run pa asina The Fighting Team derotá Fenix ku skor di 7 pa 0.
The Fighting Team a skor 7 kareda riba 8 hit. E tim tabatin un dia perfekto den defensa: 0 eror. Na bate atrobe tabata LeeAnn Craanberg ku a sobresalí. Ela bati 3 hit den 3 turno. Fenix no tabatin kareda ni hit, i tambe a fildeá bon: 0 eror. E picher pèrdèdó tabata Sarayd Ramil Linarez.
Den otro bon wega den wikènt Souax Gill’s Sport a gana ku skor di 7 pa 1 di Fenix. Mellizienne Richardson tabata e picher ganadó. Kimberley Agard a sobresalí atrobe na bate ku 2 hit den 3 turno. Souax a kaba pues ku 7 kareda riba 5 hit i 0 eror. Fenix a skor 1 kareda riba 3 hit i tabatin tambe 0 eror. Picher Sarayd Ramil Linarez a sufri e derota, miéntras ku mihó batiadó tabata Stepheny Elsbeth ku 1-1.
Finalmente Sta Rosa Angels a bolbe gana di Pichingolo. E tim di pariba a laga e aktual kampion den tereno: 5-4. Sta Rosa su 5 karedanan tabata riba 4 hit i e tim a hasi 1 eror. Picher ganadó a resultá Suheydi Faneyt, miéntras ku Jandely Ricardo tabatin 1 hit den 2 turno. Pa Pichingolo: 4 kareda, 9 hit i 3 eror. Picher Julise Koffy a sufri e derota i Emely Jonis a bati 3 hit den 4 turno.
E kampionato den Liga MCB-CSB ta sigui djarason aki, 25 di ougùstes. Pa mitar di 8 di anochi Souax Gill’s Sport ta hunga kontra The Fighting Team. E wega aki ta tuma lugá den Buena Vista Ballpark.
