E final den divishon B di Federashon Tènis di Mesa Kòrsou (FTMK) ta un seri miksto veterano. Esaki ta bai entre Mary-Ann Mac Leod i Dik Hendriks ku despues di hopi lucha den semi final a gana nan kontrinkantenan hopi mas hóben ku nan.
Despues ku anteriormente e finalistanan di divishon máksimo i Masters a bira konosí, ayera tabatin e prefinalnan den divishon A. Un total di 15 hungadó a inskribí, di kua unu no a presenta. A parti e hungadónan, tantu femenino i maskulino, huntu den 4 grupo.
Tabatin algun wega hopi bringá den e preliminarnan. Finalmente tabata Mary-Ann Mac Leod komo úniko hungadó femenino, Fawzi Ayubi, Dik Hendriks i Yazir Anthony a pasa pa semi final. E hungadónan aki a trit e presentenan den sala di rekreo Irene Moreno riba un seri hopi emoshonante. Tur dos seri a bai sinku sèt.
Mac Leod tabatin ku hunga kontra e hóben Ayubi ku a sorprende ku tremendo wega i asta bai 2-0 dilanti i tabata falta pues un sèt pa eleminá su kontrinkante. Ela gana e promé sèt despues di un lucha tenás ku 13-11 i e di dos ku 11-6.
Atras 2-0 Mac Leod no a entregá i a gana e di tres i kuater sèt ku respektivamente 11-8 i 11-6. Asina ela empatá e skor na 2-2 i forsa e di sinku sèt ku e èks kampion femenino di Kòrsou a gana ku skor di 11-5. Tin ku bisa ku apesar ku e hóben Ayubi a pèrdè, ela hunga tremendo kompetensia den su debut.
Den e otro semi final e veterano Hendriks tabatin ku hunga kontra e talentoso Anthony ku tin apenas 12 aña. Despues ku a hóben aki a pèrdè e promé i di dos sèt ku respektivamente 11-7 i 11-6, ela bini bèk den wega ganando e di tres i kuater sèt ku 11-9 i 11-5 pa asina empatá e wega i forsa e di sinku sèt. Esaki sinembargo a resultá di mas pe i Hendriks a gana ku 11-5 pa asina pasa pa final.
Pues den divishon B lo tin e aña’ki un final miksto entre Mary-Ann Mac Leod i Dik Hendriks. Esaki tambe meskos ku e finalnan den divishon A i Masters, ta tumá lugá mañan djabièrnè 7 di dezèmber den sala di rekreo Irene Moreno na Muizenberg.
