Fortuna Kurá Piedra awenochi, djarason 11 di dezèmber 2019, a para e racha di Victory Boys. E tim di pabou den kontinuashon dje kampionato lokal di futbòl den Liga MCB, a gana dje ekipo di pariba ku skor di 2-1. Den wikènt tras di lomba Centro Social Deportivo Barber a triunfá riba VESTA ku skor di 2-0.
E kampionato di futbòl lokal a kontinuá den wikènt i awe djarason ku weganan den Stadion Ergilio Hato, Brievengat. E kompetensia organisá pa Federashon Futbòl Kòrsou (FFK) ku awor ta presidí pa Shaheen Elhage, a kuminsá kayente.
Un dje timnan ku a ranka sali brabu ta Centro Barber. E ekipo ainda ta invikto i a superá entre tantu tantu e aktual kampion komo supkampion di Kòrsou. E klup di Barber despues di a derotá supkampion Skèrpènè ku skor di 3-1, a superá den wikènt tras di lomba kampion VESTA: 2-0. Joandrick Hugo i Fransjelon Andrea a hinka e golnan.
Victory Boys ku den su último kompromiso a sorprendé Centro Dominguito ku skor di 3-1, a kai awe kontra di Fortuna Kurá Piedra ku skor di 2-1. E golnan dje tim ganadó tabata di Mirgenson Perozo i Edsel Demie Jr. Rendel Girigorie a skor pa Victory Boys. ffffffff
