Groot Kwartier Stars Mangusa ayera, djabièrnè 20 di yüli 2018, a superá Marchena Braves ku skor di 11-3 den kontinuashon dje kampionato regular di beisbòl lokal. Un dia promé Wild Cats Guardian Group/KJ74 a derotá Royal Scorpions Mr Baseball My Malls ku 4-0.
E kampionato den klase superior di Federashon Beisbòl di Kòrsou (Febeko) ta den su di tres buelta. E kompetensia a kontinuá ku enkuentronan den Tio Daou Ballpark i Stadion Johnny Vrutaal.
Groot Kwartier Stars a pika dilanti 2-0 kontra di Marchena Braves. Den di 5 inen e Streanan di Groot Kwartier a añadí un kareda mas (3-0) pa den bòm di mesun entrada e kontrinkante hinka 2 kareda: 2-3. Den di 7 turno na bate Groot Kwartier ta skor 7 kareda pa sigurá e viktoria, despues ku tur dos tim a bolbe skor 1 kareda mas: 11-3.
Picher ganadó a resultá Marverich Lourens ku den 6 inen di trabou a pèrmití 3 kareda i 5 hit. Ela ponchá 5 bateadó di Marchena Braves i a duna tambe 5 base por bola. Picher Frank Moron a karga ku e derota.
Shaydromar Jamanica, Rogier Boeldak i Shuremy Fornerino tabata e mihó bateadónan pa Groot Kwartier. Jamanica a dal 2 hit den 3 turno i a empuhá 4 kareda. Boeldak tabata bon pa 3 hit den 5 turno i ku 2 kareda empuhá. Fornerino a bati 2 hit den 5 turno ku 3 kareda empuhá.
Djaweps Wild Cats for di su promé turno na bate a hinka 4 kareda i mantené e ventaha aki te final kontra di Royal Scorpions. Apesar ku picher Ruderly Manuel dje Pushinan Brabu no a pèrmití kareda, e bateadónan kontrali a dal e 8 hit, miéntras ku ela ponchá 10 Skòrpiun i duna 1 base por bola. Un nota remarkabel ta ku Wild Cats a dal solamente 1 hit, pero tòg a skor 4 kareda.
