Eks mènedjer di Atlanta Braves, Bobby Cox, a fayesé den wikènt tras di lomba na e edat di 84 aña. Relashoná ku su morto tabatin diferente homenahe emoshonal di eks-hungadó di beisbòl profeshonal i miembro di Hall of Fame Andruw Jones, i otro èks hungadónan i tambe aktual hungadónan di Atlanta Braves.
Andruw Jones ku resientemente a drenta Hall of Fame di Major League Baseball (MLB), a usa e plataforma digital X pa ekspresá su sintimentunan pa ku fayesimentu di Bobby Cox. Ela hasi esaki ku e siguiente deklarashon: “Danki pa a duná mi e chèns pa bira grandi. Danki pa a kere den mi. Danki pa a formá mi den e hende ku mi ta awe. Sosegá na pas, mi di dos tata.”
Andruw Jones realmente tabatin un relashon hopi speshal ku Cox. E yu di Kòrsou a hunga 12 temporada bou di dje komo mènedjer di Atlanta Braves. Ela firma ku e organisashon aki na e edat di 16 aña i a hasi su debut den MLB ku 19 aña den 1996. E èks manager a funshoná komo un figura importante i determinante den su bida.
Fuera di Andruw Jones, diferente otro eks-hungadó di beisbòl profeshonal ku a hunga bou di Cox tambe a lamentá su fayesimentu. Ademas, e yu di Kòrsou Ozzie Albies i e hungadónan aktual di Atlanta Braves tambe a despedí dje èks mènedjer ku un grandioso homenahe promé ku e wega di djasabra kontra Los Angeles Dodgers.
Cox a guia Atlanta Braves komo mènedjer na 14 título di divishon konsektivo, 5 título den National League i tambe na e título di “World Series” den 1995. Ela drenta Hall of Fame di MLB na aña 2014.
Aktualmente, Walt Weiss ta funshoná komo manager di Atlanta Braves. E tim ta na kabes den divishon East di National League, esta Liga Nashonal ku 28 triunfo i 13 derota.