E interes pa e di 8 edishon di Carifta Junior Chess Championships 2019 ta grandi. Ya kaba shete isla den Karibe a konfirmá nan partisipashon na e kampionato hubenil di ahedres ku tin Kòrsou komo anfitrión. E kompetensia aki ta tuma lugá di 18 pa 23 di aprel próksimo den Hilton Beach Resort.
Dirigente Jimmy Izijk di Federashon Ahedres Kòrsou (Fedako) ku ta enkargá ku organisashon di Carifta Junior Chess Championships 2019, ta kontentu ku e gran akohida pa partisipashon na e kompetensia. Esaki komo ku ya kaba a igualá e kantidat di islanan partisipante di aña pasá na Surnam ku tabata 8 delegashon. E chèns ta grandi ku mas isla ta bin aserka.
Fuera di un selekshon di ahedresistanan hubenil di Kòrsou, e sigiuente shete islanan a konfirmá nan partisipashon na Carifta Junior Chess Championships 2019: Antigua & Barbuda, Aruba, Bahamas, Barbados, Bermuda, Guyana i Trinidad & Tobago. Fuera di vários hungadó, e diferente delegashonnan ta konsistí mas aleu di entrenadónan i dirigentenan. Ta spera tambe ku vários famia dje partisipantenan lo bishitá Kòrsou.
Hilton Beach Resort ta e kas ofisial dje di 8 edishon di Carifta Junior Chess Championships. Tur delegashon ta keda den e prestigioso hòtèl aki na Piscadera. Tur e weganan ta tuma lugá den Willemstad Room ku tin un historia grandi di eventonan turístiko, deportivo i sosial.
Fuera di ta hopi agradesido na Hilton Beach Resort, Izijk i Fedako tin tambe palabranan di gratitut pa gobièrnu di Kòrsou i sektor privá ku ta patrosiná Carifta Junior Chess Championships 2019. Esakinan ta ministerio di Eseñansa, Siensia, Kultura i Depiorte di gobièrnu, Maduro & Curiel’s Bank (MCB), Refineria di Kòrsou (RdK) i Banco di Caribe (BdC). Danki na e aporte balioso dje patrosinadónan aki, e organisashon dje kampionato hubenil di ahedres aki ta posibel.
Entre tantu Fedako den kuadro dje di 8 edishon di Carifta Junior Chess Championships 2019, a lansá un wèpsait. Esaki ta kontené hopi informashon di ahedresistanan lokal, organisashon dje kampionato i tambe di Kòrsou. Pa mas informashon públiko por klek riba www.curacaochessfederation.com.