Hopi hoben yu di Kòrsou ta skohe ultimo añanan mas i mas pa bai studia na Merka i den regio i kombiná esaki ku praktika di nan ramo di deporte preferí. Virgil Isenia ta un dje hóbennan aki. Porsierto ku e ta bayendo bon den su estudio i ta profilando den tantu futbòl komo atletismo.

Virgil Isenia tin 24 aña di edat. Ya ta 4 aña pasá ku ela subi avion ku destinashon Merka. Esaki tabata riba 15 di ougùstùs 2013. Promé ku ela tuma e desishon aki, e hóben aki tabata studia na The College of the Dutch Caribbean (CDC) na Kòrsou.

Na su dushi pais Isenia tabata praktiká futbòl i atletismo. E tabata hunga futbòl den Mahuma i tabata miembro di klup di atletismo The Eagles. Fuera dje disiplinanan den atletismo, e tabata gusta kore i pues riba su mes e tabata kore distansia largu.

Isenia ta studiando Computer Science na Merka. E ta bishitá Broome College i na e skol aki e ta kombiná su estudio ku e disiplinanan deportivo di ‘cross country’ -esta korementu distansia largu- i futbòl. Di mes e talentoso yu di Kòrsou aki ta kosechá su éksitonan den su estudio i praktikando e ramonan di deporte aki den representashon di su skol.

Den su tim eskolar di futbòl e ta hunga e posishon di ‘rechts buiten’, pues dilanti riba ala drechi. E mesun posishon aki e tabata hunga na Kòrsou den Centro Hubenil Mahuma.

Isenia tokante e posishon ‘rechts buiten’ a bisa ku e gusta mes hunga riba e posishon aki. Na su skol merikano tambe e kuerpo tèkniko no ke mira otro studiante ku no ta Isenia dilanti riba ala drechi. E tèknikonan di Broome College ta haña ku e tin un postura, kondishon i tambe abilidat komo hungadó riba e posishon aki.

Mas aleu Isenia tin un opinion fiho riba studia i praktika deporte. E ta deklará ku un studiante deportista tin ku tin hopi disiplina, paso kada dia ta unu bastante okupá. Ta kuestion di un promedio di entre 8 pa 10 ora diario okupá ku estudio í despues praktika di deporte.

For di mainta trempan Isenia ta bai skol ku ta kaba entre 3or pa 4or di atardi, pa despues e drenta gym un ratu i despues for di 5or e bai praktika su ramonan di deporte te oranan di anochi. Despues pe bai kas, prepará pa e sigiuente mainta di lès, drumi i lanta trempan atrobe pa skol i praktika di deporte.

Ku su dedikashon, disiplina i konvikshon pa logra su meta, Virgil Isenia ta profilando i destakando den su estudio i praktika di deportenan na Merka.