J’Dah Girigorie ta e mihó deportista di aña pasá, esta 2022. Esaki ta nifiká ku e picher estelar di Souax Gill Sport i selekshon di sòfbòl di Kòrsou a gana e prestigioso Premio Bèto Adriana. Su koronashon a tuma lugá ayera, djaweps 6 di aprel, den WTC.
Girogorie tabatin un tremendo aña na 2022. Ela tuma e korona di Deportista di Aña 2022 for di e atleta Matthew Sophia ku a gana esaki na 2021.
Federashon Deporte I Olimpiko Kòrsou (FDOK) manera kustumber a organisá e anochi di premiashon. E organisashon deportivo prinsipal di Kòrsou a yama esaki ‘Honors Night’. E anochi tabata dediká na e baluartenan Virgilio Constancia (futbòl) Frank Hoyer (tènis), Gilbert Meriën (beisbòl) i Marcelo Zimmerman (bokseo).
Durante dje anochi a tuma lugá tambe instalashon di zes persona den Salón di Fama di FDOK. Esakinan tabata Norma Boeldak-Carolina (sòfbòl), Lai Cam Coeriel-How (karate), Alejandra Rumai (bodybuilding), Stanley Coffy (futbòl), Stanley Ignacio (paso fino) i Mirro Sabina (powerlifting).
Promé ku J’Dah Girigorie a gana Premio Bèto Adriana komo Deportista di Aña 2022, ela gana den kategorie femenino senior komo e deportista ku a presto mihó aña pasa. E otro nominadonan tabata Marie-Antoinette Keli (tènis di mesa) i Demi Schimmel (paso fino).
E atleta Matthew Sophia a sali e mihó deportista maskulino senior di aña pasá. E otro nominadonan tabata Dimitri Leon (tènis di mesa) i Dwinley Mathilda (bokseo). Por sierto ku na 2021 Sophia tabata mihó deportista maskulino hubenil.
Deportista hubenil femenino di 2022 a resulta Sophia Schotte (paso fino). E otro nominadonan tabata Kyra de Cuba (natashon) i ZsaZsa Frans (atletismo).
Rithemslij Daal (atletismo) a sali deportista hubenil maskulino di 2022. E otro nominadonan tabata Leonard Winkel (paso fino) i Jayen Viscaino (natashon).
Komo dirigente atministrativo di aña pasá a sali Jedrek Magdalena (beisbòl). E premio di mihó dirigente tèkniko a bai pa Hainley Statia (beisbòl).
FDOK a introdusí e aña aki tres kategoria nobo. Asina Glenka Antonia (atletismo) a gana e award Enith Brigitha, Kenley Jansen (Beisbòl) a gana den kategoria yu di Kòrsou internashonal i e premio di mihó selekshon tabata pa esun di sòfbòl.
