Jong Holland ta pèrdè su promé puntonan den kampionato di futbòl di Kòrsou, ora ku djadumingu 3 di dezèmber 2017, e ekipo a tabla 0-0 ku Victory Boys. Apesar dje empate aki e Trikolornan ta sigui komandá e tabla di posishon.
Federashon Futbòl di Kòrsou (FFK) a kontinuá den wikènt ku e kampionato den promé divishon, esta Liga MCB. E kompetensia aki ta hunga den Stadion Antoine Maduro na Kintjan.
Victory Boys a logra kita e promé puntonan di kampionato for di Jong Holland. E tim di Zapaté i besindario a tabla 0-0 ku e Trikolornan, ku apesar di esaki ta sigui na kabes ku 10 punto for di 4 enkuentro. Pa Victory Boys esaki ta apenas e di 2 punto den 4 wega.
‘Vriendschap Eendracht Sterken Tegen Alles’ (VESTA) a posishoná su mes na di 2 puesto riba e tabla di posishon, ganando djasabra di Inter Willemstad ku skor di 3-2. Awor e tim di Buena Vista i besindario tin 9 punto for di 4 kompromiso, miéntras ku e hóbennan di Kintjan ta keda ku 6 punto.
Union Deportivo Bándabou (Undeba) ta kompartí e di dos puesto riba tabla di posishon ku VESTA, despues ku e tim di Bándabou a triunfá djadumingu ku skor di 2-0 riba Jong Colombia. Undeba tambe tin 9 punto.
Centro Dominguito a rekuperá di su derota siman pasá, derotando djasabra e tim di Centro Social Deportivo Barber ku skor di 2-1. E triunfo aki ta nifiká ku e ekipo di Dominguito i besindario awor tin 7 punto, bon pa e di 5 puesto riba tabla di posishon.
Hubentut Fortuna a logra su promé punto den e kampionato, ora ku e tim a tabla djabièrnè 1-1 ku RKSV Scherpenheuvel. Esaki ta enserá ku e ekipo di Skèrpènè tin awor 8 punto for di 4 enkuentro, ku ta bon pa e di 4 puesto riba e tabla di posishon.