Jong Holland ta sigui invikto despues di a gana ku skor di 2 pa nada di Skèrpènè den kontinuashon di Liga MCB. E tim trikolor ku e viktoria aki a konsolidá su promé posishon riba e tabla di posishon i awor tin 28 punto for di 12 wega. Centro Dominguito a pasa pa okupá e di dos puesto ganando ku skor di 2-0 di Victory Boys.
E kampionato den promé divishon di Federashon Futbòl Kòrsou (FFK), esta Liga MCB, a sigui den wikènt ku sinku enkuentro.
E wega entre Jong Colombia i Inter Willemstad só a tèrminá den un empate: 1-1. E resultado aki a nifiká ku e tim saminero a kai for dje di dos puesto i awor ta na di tres lugá. E tim awor tin 20 punto for di 12 wega: 5 viktoria, 5 empate i 2 derota.
Centro Dominguito ku su viktoria di 2 pa nada riba Victory Boys a pasa Jong Colombia riba e tabla di posishon pa okupá e di dos lugá. E tim di Dominguito tin 21 punto for di 12 enkuentro: 5 triunfo, 6 empate i 1 wega pèrdí.
Den e otro weganan Jong Holland a gana su di 8 wega. E tim trikolor a superá Skèrpènè ku skor di 2 pa nada i tin awor 29 punto. Esaki ta produkto di 8 viktoria i 4 empate.
FC Sithoc a gana ku skor minion di SUBT, mientras ku Centro Barber a derotá Undeba ku skor di 2 pa 1. E tim di Barber ku su viktoria a subi riba e tabla di posishon i ta kompartí e di tres puesto huntu ku Jong Colombia, tur dos tin 20 punto.
