Sport.cw

Sponsored by

Sponsored by

Sponsored by

Komienso di play-off sòfbòl

E play-off di sòfbòl femenino dòbel A ta kuminsá e wikènt aki den Sabana Ballpark, despues ku den e último weganan dje kampionato regular The Fighting Team a gana di Sta Rosa Angels Vanddis 7-6 i Pichingolo Kia/Nissan a gana di Eagles Softex ku skor di 6-4.


E kampionato regular tabatin un desaroyo deportivo i emoshonante den e fase final. E timnan ku a klasifiá ta Sta Rosa Angels Vanddis, Pichingolo Kia/Nissan, The Fighting Team i Souax Gill’sport.

The Fighting Team den su último wega a sali brabu kontra Sta Rosa i despues di 4 inen tabata ganá komodamente ku skor di 6-0. E tim kampion di Kòrsou sinembargo a empatá e wega den di 6 inen: 6-6. E wega a bai èkstra inen kaminda The Fighting Team a laga Sta Rosa Angels den tereno den di 8 inen: 7-6.

Eagles Softex tambe tabatin un tremendo start kontra di Pichingolo i despues di tres inen tabata ganá 4-0. Pichingolo tambe a bin djatras i ku 1 kareda den di sinku i 3 den di seis inen a empatá e wega pa despues skor 2 kareda den di 7 inen pa gana ku skor di 6-4.

Despues dje delaster weganan di kampionato regular, awor ta bai kuminsá ku play-off. E promé wega ta riba djabièrnè, 6 di sèptèmber, i ta entre Sta Rosa Angels Vanddis i Pichingolo Kia/Nissan.

E mihó picher den e bueltanan preliminar tabata Suheydi Faneyt di Sta Rosa, ku a gana 6 wega i no a pèrdè niun. Ela kaba na di dos puesto ku un average di kareda limpi di 1.32. Su kolega di tim Leonella Elizabeth a tèrminá ku mas ponche tirá: 63 deb 41 inen, miéntras ela kaba na di tres lugá ku un average di kareda limpi di 1.86.

Den kategoria di bateo tabata Julise Koffy ku atrobe a sali kampion bate. Ela kaba e bueltanan preliminar ku un average di .532. E tabata e hungadó ku mas tantu hit konektá: 25. Di esakinan 2 tabata homerun. Ela haña tambe 15 ‘base por bola’ ku ta mas tantu ku tur otro batiadó.

Pa loke ta trata e play-off Sta Rosa Angels Vanddis i Pichingolo Kia/Nissan ta hunga un seri mihó di tres wega. E ganadó ta pasa dirèkt pa final. The Fighting Team i Souax Gill’sport tambe ta hunga un seri mihó di tres wega. E ganadó dje play-off aki despues ta bai kontra dje pèrdèdó dje seri entre Sta Rosa i Pichingolo. E tim ku gana 2 wega ta pasa pa final.

Translate »