Un tim di sinku hóben ta bai representá Kòrsou fin dje luna aki den Caribbean Youth Draughts Championship. E promé edishon dje kampionato regional aki ta tuma lugá na Trinidad & Tobago.
E tim di Kòrsou ta konsistí dje sigiuente hóbennan: Ri-Anne Rafaela (5-5-2010), Tahirah Rombley (7-2-2012), Patrick Oseana (5-2-2012), Eliston Ercicia (31-12-2008) i Prince Mauricio. (16-3-2012).
Porsierto ku tur e sinku hungadónan di dam ei ta forma parti tambe dje kluo di dam hubenil Rais dje konosido hungadó di dam i alabes dirigente Raoul Alias. E klup ta eksistí for di 2021 i tin lès i entrenamentu di dam riba tur djasabra di 9or di mainta pa 12or di mèrdia. Esaki ta na Kaya Kurtisa 2 den e bario di San Fuego, Zapateer/Bonam. E promé edishon di Caribbean Youth Draughts Championship ta tuma lugá di 23 pa 30 di mart i ta alabes un asina yamá challenge competition. E promé tres finalistanan dje kampionato aki ta klasifiká pa hunga den kampionato mundial dam hubenil. Esaki ta tuma lugá den luna di oktober dje aña akí na Polonia.
