Kòrsou, awe djasabra 16 di mart 2019, a klasifiká pa final dje torneo di futbòl hubenil Himno i Bandera na Aruba. E selekshon di futbolistanan di 13 aña i mas hoben (U13) a gana ku skor di 2-1 di Boneiru.
E selekshon di Kòrsou a viaha djarason pa Aruba pa kompetí den e torneo internashonal na okashon dje tradishonal selebrashon di Dia di Himno i Bandera di Aruba. Esaki ta konta tambe ku partisipashon di selekshonnan for di Boneiru i Colombia.
Edler de Castro ta fungi komo entrenadó dje selekshon di Kòrsou, miéntras ku David Heykoop ta su asistente. E tim ta konsistí dje sigiuente 18 hungadónan: Juninho Floranus, Riqueby Florentina, George Halley, Shuvienchelo Hooi, Dayshawn Isabella, Declan Kleiboer, Giordinelo Meulens, Noah Calister, Kevin Hato, Luigi Inesia, Rigzair Ipatia, Darwin Lourens, Freadyen Michiel, Jursen Ortela, Cristian Pop, Renald Renalus, Marco Wever i Jeandino Windster.
Hefe di delegashon dje selekshon ta Stanley Coffy ku ta miembro di direktiva di Federashon Futbòl Kòrsou (FFK). Tambe a viaha pa Aruba masahista Severinus Ritfeld i Roderick Rojer ku ta enkargá ku e materialnan dje tim.
E selekshon U13 di Kòrsou a kuminsá e torneo Himno i Bandera na Aruba djaweps 14 di mart ku un derota kontra e tim dje pais anfitrión: 0-1. Boneiru den e otro enkuentro riba e promé dia di torneo a gana ku skor di 3-0 di Colombia.
Riba e di dos dia di kompetensia, ayera djabièrnè, Kòrsou a gana Colombia ku skor konvinsente di 4-0. Fredyean Michel a hinka 4 dje golnan. Jeandino Windster tambe a skor. Den e otro wega Aruba a gana ku skor mínimo di Boneiru i asina pasa pa komandá e tabla di posishon ku dos viktoria.
Awe e selekshon U13 di Kòrsou a hunga kontra di Boneiru i a gana ku skor di 2-1. Atrobe Fredyean Michel a hinka gol i awor tin 4 riba su nòmber. E otro gol di Kòrsou tabata di Requebe Florentina. Den e di dos wega awe djasabra e selekshon Colombia a sorprendé Aruba: 4-3.
Kòrsou i Aruba pues a kaba e buelta preliminar ku 6 punto i pues ta pasa pa final. Tur dos tim a gana 2 wega i pèrdè 1. E selekshon di Kòrsou a hinka 6 gol i haña 2 kontra, miéntras Aruba a hinka 5 gol i haña 4 kontra.