E selekshon di futbòl femenino di Kòrsou, awe djaweps 30 di novèmber, ta hunga kontra di Anguilla. Pa despues riba djaluna 4 di dezèmber e tim hunga kontra di Cayman Islands. Esaki ta den kompetensia di Concacaf Women Road to Gold Cup 2023.
E wega di mañan dje selekshon lokal femenino ta tuma luga na Anguilla. E selekshon ta bou di guia dje entrenadó Dean Gorré, ku porsierto tambe ta entrenadó dje selekshon maskulino di Kòrsou.
Gorré tin komo su asistentenan Raúl Triana Gonzalez i Pablo Alomá Mark, ku e último komo entrenadó di keeper. Denice Linger Berggraaf ta e masahista miéntras Eartha Helstone ta dòkter dje selekshon femenino. Jadira Laaf ta enkargá ku e materialnan i mènèdjer dje tim ta Christine Davelaar. Komo hefe di delegashon na Anguilla ta fungi Sharetti Bryan.
Despues dje wega na Anguilla e selekshon femenino di Kòrsou ta regresá kas i sigui ku su preparashon pa e próksimo kompromiso. Esaki ta kontra di Cayman Islands i ta tuma lugá riba djaluna 4 di dezèmber den Stadion Rignaal ‘Jean’ Francisca. E wega ta kuminsá 8or di anochi.
Kòrsou ta faborito pa gana tur dos dje weganan aki den e kompetensia di Concacaf Women Road to Gold Cup 2023. Si e selekshon logra e resultado positivo aki, e ta promové pa poule B.