E kompetensia den divishon A di Futsal Federation Curaçao ta hopi interesante. Kos a bira hopi kayente despues ku FC FCF a zona un kampanazo derotando kampion FC San Lucas 1-0. Awor tin tres tim empatá na e promé puesto.
E kampionato di futsal ta keda hungá den sala Niels Liberia di stadion Odulio Willems den Suffisant. E ekiponan ku ta partisipá a sòru te awor pa bon weganan.
Asina FC FCF a sorprendé FC San Lucas, derotando e tim kampion di Kòrsou ku skor di 1-0. Wensley Albertina a hinka e úniko gol dje wega. Esaki tabata den e promé parti dje enkuentro. E triunfo ei a pone ku FC FCF a empatá ku FC San Lucas na e promé puesto riba tabla ku posishon, tur dos tim ku 6 punto.
FC Don Bosco tambe a ubiká su mes na e promé puesto, ora ku e tim a gana ku skor di 2-0 di FC Babranis 01. Rudrick Pop a hinka tur dos gol: un den e promé tempu i e otro den despues di sosiego.
FC San Lucas i FC Don Bosco tin sinembargo un wega menos hungá ku FC FCF. San Lucas a hunga 4 wega, gana 3 i pèrdè 1. Don Bosco tin mesun sifranan: 3 ganá i 1 pèrdí. FCF tambe a gana 3 enkuentro, pero a sufri entre tantu 2 derota.
FC Babranis 01 ta okupá e di 4 puesto riba e tabla di posishon ku 5 punto. Esaki ta produkto di 2 triunfo, 1 empate i 1 derota.
E kompetensia ta kontinuá awe nochi, djaweps 12 di aprel 2018, ku un enkuentro den divishon A. Esaki ta kuminsá 10’or i ta bai entre FC FCF i FC Babranis 01. Mañan djabièrnè 13 di aprel ta topa otro for di 9’or di anochi FC IGA i FC Don Bosco, miéntras ku 10’or ta planiá e konfrontashon entre FC RO Family i FC San Lucas. Djasabra anochi 9’or tin e wega Ocean View FC vs FFCE United FC.
Den divishon B tambe kos ta hopi kayente. E tim di FC Securitas Antias ta komandá e tabla di posishon ku 7 punto: 3 viktoria i un tabla, pues invikto ainda. FC Sta Rosa Stars ta okupá e di dos puesto ku 6 punto: 3 triunfo i 1 derota. Na di 3 lugá tin un 5 tim empatá ku 5 punto: Fc Sta Helena, FC Bandolino, FC Five Stars, FC Dòmi i FC Excellent.
Un nota remarkabel den divishon B ta, ku fuera di FC Securitas Antias tambe FC Bandolino i FC Five Stars no a pèrdè wega. E dos último nan aki tin te ainda 1 triunfo i 3 empate registrá.
E kompetensia den divishon B tambe ta kontinuá awenochi, djaweps 12 di aprel: 8’or FC Excellent vs FC Babranis 02 i 9’or FC Securitas Antias vs Fabarma FC. Mañan djabièrnè 13 di aprel tin pa 8’or Fc Ocean View Elite vs FC Sta Helena. Djasabra anochi tin programá pa 7’or FC Five Stars vs FC Celestial Boys i pa 8’or FC Bandolino vs Sta Rosa Stars.