E selekshonnan di Liga Pabou a dominá den e District Tournament dje organisashon Curaçao Little League. Nan a gana den tres dje kuater divishonnan, esta Little, Junior i Senior. Liga Pariba a gana den divishon Minor.
Curaçao Little League den e wikènt largu tras di lomba a sigui ku su asina yamá District Tournament. E weganan a bai entre selekshonnan di Liga Pariba, Liga Pabou i tambe Liga Willemstad.
E selekshon ku gana den kada liga ta haña e derechi pa representá Kòrsou den kampionatonan di Karibe i Latino Amerika. Ganadónan dje kampionatonan regional despues te representá e regio den World Series di lada liga.
Liga Pariba a gana e seri di weganan den divishon Minor 3 pa 1 di Liga Pabou. Pues e selekshon di Liga Pariba ta representá Kòrsou den e kampionato regional ku ta tuma lugá entrée 15 pa 24 di yüli na Mayaguez, Puerto Rico.
Den Little League tabata e selekshon di Liga Pabou ku a terminá invikto ku kuater viktoria. E selekshon aki a gana dos biaha di Liga Pariba i tambe dos biaha di Liga Willemstad. E ta bai representá Kòrsou entre 5 pa10 yüli den e kampionato regional ku ta tuma lugáa na Punta Cana, repúblika Dominikana.
E selekshon di Liga Pabou a gana tambe e seri di weganan den divishon Junior. Ela superá Liga Pariba ku 3 viktoria kontra 1 derota. Esaki ta nifiká ku Pabou ta representá Kòrsou den e kampionato regional entre 8 pa 17 di yüli na Caguas, Puerto Rico.
Finalmente den divishon Senior tambe Liga Pabou a gana e seri di weganan. Ela registrá 3 viktoria i a pèrdè 1 wega kontra di Liga Pariba. Asina’ki Liga Pabou a haña e derechi pa representá Kòrsou den e kampionato regional ku ta tuma lugá di 23 pa 30 di yüli ma Guayana, Puerto Rico.
