Major League Baseball (MLB) a kuminsá ayera, djarason 21 di febrüari 2018, ku su asina yamá ‘spring training’. Esaki ta un seri di weganan di fogeo entre e diferente timnan, kaminda vários hungadó yu di Kòrsou tambe lo mira akshon. E kampionato mes ta ranka sali ofisialmente riba djaweps 29 di mart.
E ‘spring training’ ta kuminsá ku e timnan di Liga Grandi hungando kontra di ekiponan den kategoria mas abou di nan mes sukursal. Asina e ekipo Arizona Diamondbacks a entrená ayera kontra Sun Devils.
Riba e di dos fecha di ‘spring training’ awe djaweps, Boston Red Sox ta hunga dos wega. E promé enkuentro ta kontra Huskies, miéntras ku e sigiuente kontrinkante ta Eagles.
Xander Bogaerts di Aruba ta militá den Boston Red Sox. E ta ‘short stop’ pero por defende tèrsera base tambe i ta keda yamá pa su nòmber ku ta kuminsá ku X i tambe pa su hazañanan den defensa i na bate: The X-Man i Bogey. Su number di kamiseta ta #2.
E salario di Bogaerts ta 7.05 mion dòler. Ela nase riba dia 1 di òktober 1992 i pues tin 25 aña. Ela kaba temporada 2017 ku un average di .273 ku ta produkto di 156 hit den 571 turno na bate.
E otro enkuentronan di mañan den ‘spring training’ ta: Detroit Tigers vs Mocs, Philadelphia Phillies vs Spartans i Minnesota Twins vs Gophers.