Ozzie Albies den su promé wega di ‘spring training’ den Major League Baseball (MLB) ayera, djabièrnè 23 di febrüari 2018, a dal su promé hit. E no por a evitá sinembargo ku su tim Atlanta Braves a pèrdè ku 2-6 di New York Mets.
E talentoso yu di Kòrsou a kuminsá wega komo promé bateadó i ela defendé e di dos base. Albies a presentá na tres okashon den kaha di bateo i a dal pues un hit. Ela haña un ponche i a laga 2 koredó na base.
(Foto Ozzie Albies)
Te ku di 7 entrada di wega Atlanta tabata ganá 1-0. Den e promé mitar di 8 ineng e tim di Albies a skor un kareda mas i hasi e wega 2-0, pero Mets den serada di mesun wega a hinka 6 kareda hasi e enkuentro 6-2 ku kual skor e konfrontashon a tèrminá despues tambe.
Otro yu di Kòrsou ku ayera a mira akshon den ‘spring training’ tabata Didi Gregorius. Ela kuminsá komo ‘short stop’ i bateando di 5 den alineashon di New York Yankees. E no a logra konektá hit den 2 turno na bate, pero su ekipo a gana sí ku skor di 3-1 di Detroit Tigers.
Mas aleu Tampa Bay Devil Rays a gana ku skor di 6-4 dje tim di Jonathan Schoop ku ta Baltimore Orioles. E yu di Kòrsou sinembargo no tabata den alineashon. Porsierto ku promé ku ‘spring training’ a kuminsá e talentoso hungadó aki a firma un kontrato nobo di 8,5 mion dòler ku su ekipo.
(Foto Jonathan Schoop)
Chicago White Sox a pèrdè ku skor abultá di Los Angeles Dodgers di Kenley Jansen: 5-13. E as relevista yu di Kòrsou tampoko tabatin ku subi montíkulo pa su tim.
Anaheim Angels of Los Angeles ku ta ekipo den kua Andrelton Simmons ta militá, a pèrdè ku skort pèrtá di 8-9 kontra Oakland Athletics. E yu di Kòrsou tampoko a mira akshon den e wega aki.
Milwaukee Brewers a dal San Francisco Giants di Hensley Meulens ku skor di 6-5. E yu di Kòrsou e aña aki ta ‘bench coach’ di San Francisco, esta man drechi dje mènedjer Bruce Bochy. Te ku temporada pasá e tabata fungí komo ‘coach’ di bateo.
Xander Bogaerts sí a mira akshon pa Boston Red Sox kontra di Minnesota Twins. Su tim a gana e enkuentro ku skor di 4-3. E Arubiano a kuminsá komo ‘short stop’ i di dos bateadó. Den 1 turno e no a logra konektá hit, pero sí a skor un dje karedanan di Red Sox.
E sobrá resultadonan dje weganan di ‘spring training’ di ayera djabièrnè ta: St Louis Cardinals vs Miami Marlins 4-6, Washington Nationals vs Houston Astros 2-3, Minnesota Twins vs Boston Red Sox 3-4, Pittsburgh Pirates vs Tampa Bay Devil Rays 3-6, Philadelphia Phillies vs Toronto Blue Jays 1-2,
Chicago Cubs vs Milwaukee Brewers 1-2, Cincinnati Reds vs Cleveland Indians 6-4, Seatle Mariners vs San Diego Padres 3-2 i Arizona Diamondbacks vs Colorado Rockies 7-6.