Major League Baseball (MLB) ta kontinuá ku e asina yamá ‘MLB Elite Program’ na Kòrsou. E programa aki ta ranka sali otro luna sèptèmber, miéntras ku na fin dje luna aki mes lo tin atrobe un seri di ’tryout’ den Tio Daou Ballpark.

Despues ku MLB a evaluá e proyekto piloto di ‘MLB Curaçao Elite Program’ ku a tuma lugá na kuminsamentu dje aña’ki i ku a dura 6 siman, e desishon a kai pa sigui ku esaki pa un término mas largu. E plan ta pa kuminsá ku e programa den di dos siman di sèptèmber.

Meskos ku tabata e kaso ku e programa piloto, MLB ta bai tene un ’tryout’ di tres dia enbes di dos dia manera biaha pasa. MLB a tuma nota di e rèspòns grandi di último biaha i p’esei a opta pa bai tres dia ya asina por wak den grupo di edat i tambe por wak kada hungadó mas mihó.

E seri di ’tryout’ ta tuma lugá riba 24, 25 i 26 di ougùstùs den Tio Daou Ballpark. E proseso ta ku e pelotero ku kier partisipá mester registrá adelantá sino e no por partisipá. Esnan ku tin e deseo pa forma parti di ‘MLB Curaçao Elite Program’, tin ku manda un email na mlbcuracaotryouts@mlb.com indikando nan deseo pa partisipá na e seri di ’tryout’. Djei e hóben ta risibí un mail bèk ku e fecha i orario ku e tin ku presentá pa tryout i tur dokumento di inskripshon.

Manera ta konosi e programa di MLB ya ta aktivo den diferente pais manera entre otro Afrika, Nicaragua, México, Brasil i Puerto Rico. Curaçao Baseball Development Foundation (CBDF) a bin ta traha hopi di aserka ku MLB último añanan ku vários proyekto manera entre otro e Coaches Development Program i RBI. Pa e proyekto aki tambe CBDF a duna tur asistensia i konseho pa e proyekto aki.

MLB Curaçao Elite Program ta diseñá pa e pelotero élite ku ta demonstrá un potensial pa mañan konbertí su mes den un hungadó di beisbòl profeshonal. MLB ta tene e seri di ’tryout’ ku nan mes scoutnan, pa asina por skohe e hungadónan ku lo forma parti di e programa. Tur pelotero entre 13 pa 18 aña por registrá.

E peloteronan skohe tin ku asistí na e kampamentu di entrenamentu despues di ora di skol. Esaki ta tres biaha pa siman. E kuerpo tékniko ta konsistí di coachnan di MLB ku ta spesialisá den kada área di e wega pues bateo, pitcheo, kècher, infield i outfield. Entrenadónan lokal tambe ta bai forma parti di e kuerpo tékniko.

E intenshon dje programa i seri di ’tryout’ ta pa yuda ku e desaroyo aun mas tantu di e pelotero prospekto pa asina oumentá su potensial pa keda evaluá i firma pa ekiponan di MLB. Importante ta tambe ku MLB awor aki tin un filosofia nobo ku ta pone énfasis riba estudio i pa keda ku e opshon pa e pelotero ku tòg no tin e sufisiente talento pa firma bira un studiante/atleta. E programa aki tambe ta realisabel danki na kontribushon di CTB ku no mas ku algun tempu aserka un akuerdo ku MLB.