Centro Social Deportivo Barber a bolbe registrá otro triunfo den kontinuashon dje kampionato lokal di futbòl. E tim a superá Skèrpènè ku skor konbinsente di 3-1.

Federashon Futbòl Kòrsou (FFK) awe a sigui ku e kompetensia di futbòl den Liga MCB. E enkuentro entre Centro Barber i Skèrpènè a tuma lugá den Stadion Dr Antoine Maduro na Kinchan.

Despues ku Skèrpènè a bapuliá Union Deportivo Bándabou (Undeba) den wikènt ku skor di 8-0, awenochi e tim a skor solamente un gol. Porsierto ku Jordan Kastaneer na di 14 minüt a hinka un outogol i asina pone Barber 1-0 dilanti.

Den di dos tempu tabata Roderick Boelijn ku a hasi e skor 2-0. Esaki tabata na di 52 minüt di wega. Christopher Isenia na di 54 minüt a skor pa Skèrpènè: 1-2. Roshyon Anita sinembargo a paga tur lus pa e tim di frater ora ku na di 73 minüt ela skor di tres gol pa Barber.