Jong Holland a logra awe, djadumingu 7 di yanüari 2018, su di 6 triunfo den kampionato di Kòrsou. E Trikolornan a gana ku skor di 2-0 di Centro Social Deportivo Barber i asina tuma mas distansia for di demas timnan den promé divishon, esta Liga MCB.
Federashon Futbòl di Kòrsou (FFK) a kontinuá awe ku su kampionato regular. Tabatin dos enkuentro den stadion Dr Antoine Maduro, ku ta situá na Kintjan.
Den e promé wega Jong Holland a derotá Centro Barber 2-0. Na di 26 minüt Jurensley Martina a pone e Trikolornan dilanti, pa despues Randall Winklaar seyá e triunfo na di 41 minüt di wega.
Porsierto ku esei tabata viktoria number 6 pa Jong Holland den 7 wega. E tim tin tambe un empate i ta komandá e tabla di posishon komfortabel ku 19 punto.
Den e di dos enkuentro awe djadumingu, Union Deportivo Bándabou (Undeba) a bini djatras pa gana ku skor di 3-2 di Skèrpènè.
Luis Chavez a pone Skèrpènè dilanti na apenas 4 minüt di wega. E alegria sinembargo tabata di korto durashon serka e tim di Fraternan, komo ku Zjurdiene Laken na di 6 minüt a empatá pa Undeba.
Angerick Dorothea a pone Skèrpènè na di 26 minüt atrobe dilanti (2-1), pero den di dos tempu Undeba a skor dos bia faltando 20 minüt di wega. Lendell Johannes a empatá e enkuentro (2-2) na di 70 minüt, miéntras ku 2 minüt despues Jonathan Getruide a disidí e wega na fabor dje tim di Bándabou.
Undeba via dje triunfo ta subi bai okupá e di dos lugá riba tabla di posishon ku 13 punto for di 7 enkuentro. E ekipo ‘Vriendschap Eendracht Sterken Tegen Alles’ (VESTA) ku a pèrdè kontra di Victory Boys djabièrnè ta okupá di tres puesto ku 12 punto for di 7 wega, miéntras ku Skèrpènè ta kai na di 4 puesto ku 11 punto for di 7 enkuentro.
