Liga Pabou Little League a subi avion awe, djadumingu 9 di yüli, rumbo pa Puerto Rico. Esaki ta relashoná ku e tim aki su partisipashon den e kompetensia Little League Caribbean 2023. E kampionato aki ta ranka sali mañan djaluna.
E kompetensia di Little League Caribbean 2023 ta tuma lugá na Yabucoa, Puerto Rico. Dos tim ta representá e país anfitrión aki, di kua e kompetensia ta dura te ku djasabra 15 di yüli.
Fuera di Puerto Rico ku dos tim i tambe Liga Pabou Kòrsou, Aruba, US Virgin Islands i Repúblika Dominikana ta kompetí den e kampionato di Karibe. E timnan ta konsistí di hungadónan di beisbòl di 11 i 12 aña.
E tim kampion dje kompetensia ta representá Karibe den Little League World Series na Williamsport, Merka. E kampionato aki ta planiá pa tuma lugá di 16 pa 27 di ougùstùs dje aña’ki.