E selekshonnan di Liga Pariba i Liga Pabou ta ketu bai invikto den e kampionato di Karibe di Little League. E timnan di Kòrsou ta komandá e tabla di posishon den nan respektivo pul.
Kòrsou komo pais anfitrión dje kampionato di beisbòl pa mucha di entre 10 pa 13 aña, ta kompetí ku dos tim. Mayoria dje weganan ta tuma lugá den parke di beisbòl Post 6 na Rio Canario. Tin algun wega tambe den Frank Curiel Ballpark na Sta Maria.
Awe e selekshon di Liga Pariba a gana su di 5 wega i asina finalisá invikto e bueltanan preliminar. E tim a gana awe ku skor abultá, esta nòkout, di Antigua: 20-0.
Den promé inen Liga Pariba a hinka 5 kareda pa despues eksplotá den di dos inen ku no menos ku 15 kareda: 20-0. E selekshon a bati 15 hit bou di kua 3 homerun, 1 tripel i 4 doblete. Picher Thaima Maximiliana a gana e wega pa Liga Pariba.
Nathaneal Cijntje, Johaimry Balentina, Richny Frans, Rubiorne Manuel, Jadeal Janga i Chey De Lanoy a destaka na bate pa Liga Pariba. Cijntje a bati 3 hit den 3 turno, bou di kua 1 homerun, 1 tripel i 1 doblete. Ku e batasonan aki ela sòru pa un total di 5 kareda pa su tim. Balentina tabata bon pa 2 hit den 2 turno. Manuel i Frans a bati kada un 2 hit den 3 turno. Frans tambe a dal un homerun. Janga i De Lanoy a bati 1 hit den 1 turno. e hit di Janga tabata un homerun.
E selekshon di Liga Pabou tambe a registrá un nòkout, ora ela gana ku skor di 13-3 di US Virgin Islands, Esaki tabata e di 4 viktoria sin derota.
E wega a kuminsá ku tantu Liga Pabou komo US Virgin Islands hinkando 2 kareda den promé inen. E tim di Kòrsou despues a skor 1 kareda den di dos inen pa tuma ventaha di 3-2. Den di tres turno Liga Pabou a skor 10 kareda i habri e wega for di otro.
Picher ganadó a resultá Curley Martha. Den 3 inen di trabou ela pèrmití 1 kareda riba 3 hit i a ponchá 5 batiadó. Deshandro Tromp, Lendric Koffy i Zion Pardo a sobresalí na bate, kada un ku 1 hit den 1 turno.
Liga Pabou vs US Virgen Island 
Domonicam Republic vs Liga Pariba 
Aruba vs Liga Pabou 
