Pichingolo Nissan ayera, djadumingu 15 di oktober, a klasifiká pa final femenino di kampionato lokal di sòfbòl. E tim a gana den wikènt dos wega den semi final kontra Eagles Softex i awor tin ku enfrentá den gran final Sta Rosa Angels Vanddis.
Por sierto ku Sta Rosa Angels Vanddis a pasa mesora pa final despues di a derotá Pichingolo Nissan den dos wega wikènt anterior. E promé enkuentro a terminá ku skor di 14-6 i e di dos wega ku 4-3.
E derota a nifiká ku Pichingolo Nissan tabatin ku hunga semi final kontra ganadó dje serie kontra Eagles Softex i Demolition. Esaki a resultá finalmente Eagles Softex.
Den wikènt tras di lomba Eagles Softex i Pichingolo Nissan a enfrentá otro den Post 6 Ballpark na Rio Canario. Nan a hunga un serie ‘best of 3′, esta e tim ku gana 2 wega lo sigui pa hunga gran final kontra e tim di Sta Rosa Angels Vanddis.
Den e promé wega djasabra Eagles Softex tabata parse di bai gana fasil ora ku e tim a tuma ventaha di 6-0 den apenas 3 entrada. Pichingolo Nissan sinembargo no a entregá. Den e sigiuente entradanan eterno kampionnan a logra skor su karedanan i asta empatá e wega den di 6 entrada pa despues di esaki skor e kareda di viktoria: 8-7.
Djadumingu tabatin e di dos enkuentro di semi final, kaminda Pichingolo Nissan i Eagles Softex un biaha mas a luchá tenás kontra di otro. E wega aki a yega 7 entrada empatá na 4 kareda i esaki a enserá ku a pasa pa hunga prolongashon, esta entrada èkstra. Kada tim e ora ei ta kuminsá esaki ku un koredó na segunda base.
Den e entrada èkstra ku a sigui Pichingolo Nissan a logra skor 4 kareda (8-4) i asina pone Eagles Softex bou di tremendo preshon. E tim di su banda tambe a montá un atake pero a skor solamente 1 kareda i asina e enkuentro a terminá den un viktoria di 8-5 pa Pichingolo Nissan ku a nifiká tambe klasifikashon pa hunga final kontra di Sta Rosa Angels Vanddis.
Na mesun Post 6 Ballpark na Rio Canario tabatin tambe komienso dje seri di weganan di promoshon/degradashon femenino entre Nos Tei Office Supply i Souax SBT Gill’s Sport. Nos Tei komo ekipo ku a terminá último den klase superior (AA) tin ku hunga kontra supkampion di klase A ku ta Souax. E kampion di klase A a resultá Sta Rosa Angels Vanddis ku pues tin representashon kaba den klase superior.
Den e promé wega dje seri di promoshon/degradashon Souax ta bini dja tras pa den ultimo entrada skor 6 kareda i gana ku 7-4 di Nos Tei. Den di dos enkuentro Nos Tei a bini disidido pa no pasa loke a pasa un dia promé i a triunfá ku skor di 14-7. E seri aki, ku ta un ‘best of 5’, ta sigui otro wikènt.
