Pichingolo Kia/Nissan ayera djadumingu, 8 di sèptèmber 2019, a empatá e seri prefinal ganando di Sta Rosa Angels Vanddis ku skor di 10-3. The Fightning Team a gana e otro seri derotando Souax Gill’sport pa di dos bia i asina eleminando e kontrinkante aki: 7-6.
E play-off den divishon superior di Curaçaose Softball Bond (CSB) a ranka sali djabièrnè den Sabana Ballpark. Tabatin wega tambe djasabra i ayera djadumingu na Buena Vista Ballpark.
Sta Rosa Angels Vanddis a gana e wega ku a tuma lugá djabièrnè ku skor di 6-5 di Pichingolo Kia Nissan. E enkuentro aki a bai èkstra inen. Picher ganadó tabata Leonella Elizabeth ku den 9 inen a pèrmití 5 kareda, di kua 1 só tabata limpi. E picher estelar di Sta Rosa no tabatin su mihó anochi, komo ku ela duna no menos ku 7 ‘base por bola’, pero di otro banda a ponchá 9 batiadó.
Shurvienska Wawoe a tèrminá ku e mihó sifranan di bateo pa Sta Rosa Angels: 3 hit den 4 turno. Angelique Antonio a bati 1 hit den 1 turno i a haña mas aleu tres ‘base por bola’.
Picher Shana te Vrede a pèrdè e wega. Ela pèrmití 6 kareda, di kua 4 tabata limpi. E tampoko tabatin su mihó anochi, komo ku ela duna 9 ‘base por bola’ i di otro banda tambe a ponchá 9 batiadó. Un nota remarkabel ta ku den e enkuentro aki Pichingolo a bati solamente 3 hit.
E timnan a bolbe topa otro djadumingu i Pichingolo a gana e wega aki pa asina empatá e seri: 10-3. E biaha aki Shana te Vrede a pichá mihó limitando Sta Rosa na solamente 2 hit. Abigail Daal i Julise Koffy tabata e mihó batiadó pa Pichingolo. Daal a bati 3 hit den 3 turno, miéntras ku Koffy tabata bon pa 2 hit den 2 turno. Kampion picher di e kampionato regular, Suheydi Faneyt, a pèrdè e wega pa Sta Rosa Angels.
Den e otro seri The Finghting Team a gana e promé wega ku skor di 6-2. Den e di dos enkuentro Souax Gill’sport a duna mas bataya, pero a pèrdè esaki tambe: 6-7. Picher Lee-Ann Craanberg a gana tur dos wega. Ku e dos viktorianan aki The Fighting Team a pasa pa e sigiuente buelta i lo hunga kontra dje pèrdèdó dje seri entre Sta Rosa Angels i Pichingolo.
Por sierto ku Sta Rosa Angels i Pichingolo ta hunga djarason anochi e wega desisivo. Esaki ta kuminsá 8or di anochi den Sabana Ballpark.
