Sta Maria Pirates Chippie ayera, djaluna 1 di yüli 2019, a gana pèrtá di Wild Cats Guardian Group/KJ74: 5-4. Apesar dje derota aki e Pushinan Brabu ta sigui komodo na kabes dje kampionato di beisbòl dòbel A ku 15 triunfo i awor 4 derota.
Federashon Beisbòl Kòrsou (Febeko) a kontinuá ayera ku e kompetensia den Liga Aqualectra den Stadion Johnny Vrutaal na Rif, Otrobanda. Ta trata komienso dje di tres buelta.
Sta Maria Pirates ku ta e aktual kampion di Kòrsou a sali brabu. Den e promé inen e tim a skor 4 kareda. Den su di dos turno e Piratanan a hinka un kareda mas pa tuma ventaha komodo di 5-0 i tur kos tabata mustra k’e tim di Sta Maria tabata logra un triunfo fasil.
Despues ku den seis inen Wild Cats no a skor niun kareda, e tim a eksplotá den su di shete turno. E Pushinan Brabu a skor 4 kareda i aserká e Piratanan te na 4-5. Sinembargo esei tabata tur kos i e tim kampion di Kòrsou a konservá e ventaha minimo di 1 kareda pa logra su di 11 viktoria kontra 8 derota.
Picher Sherwenne Antersijn a gana e wega pa Sta Maria. Den 6,2 inen di trabou ela pèrmití 3 kareda riba 5 hit. Ela ponchá 2 batiadó i duna 3 ‘base por bola’. Johannes Gregorius Jr a sobresalí na bate pa e Piratanan. Ela bati 3 hit den 5 turno.
Picher pèrdèdó a resultá Ruderly Manuel ku den 6 inen a pèrmití 5 kareda riba 7 hit. Ela ponchá 1 batiadó i a duna 4 ‘base por bola’. Raysheron Michel tabatin un bon anochi den kaha di bateo ku tambe 3 hit den 5 turno pa e Pushinan Brabu.
E kampionato ta sigui mañan, djarason 3 di yüli, den atrobe Stadion Johnny Vrutaal. Fire Birds Skènikèsh ta hunga kontra di Groot Kwartier Stars Mangusá. E wega aki ta kuminsá mitar di 8 di anochi.