E promé wega di final di beisbòl dòbel A tabata un enkuentro ku tur kos aden: hopi kareda, hit, eror i awaseru, pero tambe ku bon picheo i emoshonante. Sta Maria Pirates Chippie a gana e konfrontashon aki ayera, djamars 16 di oktober, ku skor di 8-7 di Wild Cats Guardian Group/KJ74.
Tio Daou ayeranochi tabata esenario dje promé wega di final entre aktual kampion Wild Cats i supkampion Sta Maria Pirates. E Pushinan Brabu a klasifiká ganando di Marchena Braves, miéntras k’e Piratanan a pasa p’e seri desisivo derotando Sta Rosa Indians.
Tabata Sta Maria Pirates ku a pika dilanti anotando 2 kareda den su promé turno na bate: 2-0. Wild Cats ku 3 kareda den di tres inen ta bòltu e skor na su fabor: 3-2. Despues di esaki e kampion di Kòrsou a skor 2 kareda den su di kuater turno na bate i 1 mas den di sinku inen i tabata mustra di bai gana e wega.
Despues ku Sta Maria a hinka 1 kareda den di kuater inen i atras 3-6, e tim a bòltu kashaka i hinka 4 kareda den su di 6 turno na bate: 7-6. Den di shete inen Wild Cats a empatá e wega na 7 kareda. Tur esaki apesar ku awaseru a stroba e wega algun biaha.
For dje di ocho inen pichernan di relevo di tur dos tim a dominá e bateadónan kontrali. Prinsipalmente Jonathan Balentina i Raydel Isabella di Sta Maria ku sosten di nan defensa a dominá e ofensiva di Wild Cats. Den kuater inen di trabou Balentina a pèrmití solamente 1 hit, miéntras ku Isabella den dos entrada tabata hermetiko i a gana e wega.
Pa Wild Cats tabata picher relevista Kennimar Martina ku a wanta Sta Maria riba 0 kareda den 2,1 inen, apesar ku ela pèrmití 3 hit. Richard Moesker den 4,1 inen a pèrmití e kareda di viktoria pa Sta Maria riba 3 hit. Ela duna 3 ‘base por bola’ i a sufri e derota.
Richene Martina a kuminsá riba montíkulo pa Sta Maria. Den 5 inen ela pèrmití 8 hit i 6 kareda, di kua 4 tabata limpi. Shair Lacrus a relevá Martina den di 6 inen i a pèrmití 1 kareda riba 3 hit. Pa Wild Cats e picher habridó tabata Ruderly Manuel ku den 5,1 inen a pèrmití 4 hit i 6 kareda di kua 4 tabata limpi. Carol Servania a drenta den di 6 inen na su lugá i a pèrmití 1 kareda.
Johannes Gregorius Jr tabata e mihó bateadó pa Sta Maria. Ela dal 2 hit den 4 turno. E pichernan kontrali a dun’é 3 ‘base por bola’. Ela skor 2 kareda i empuhá 1. Pa Wild Cats tabata Rojean Cleofa k’a bati mihó: 2 hit den 4 turno.
E seri final ku ta un asina yamá ‘best of 7’ ta sigui mañan djaweps, 18 di oktober, ku e di dos wega. Esaki tambe ta tuma lugá den Tio Daou Ballpark na Zapaté i ta kuminsá 8’or di anochi.
