Sta Maria Pirates Chippie ayera, djaluna 13 di mei 2019, a pèrdè su di dos wega konsekutivo den kampionato di beisbòl Dòbel A. Royal Scorpions Mr Baseball CPS/AGT a gana dje kampion di Kòrsou ku skor di 5-2.
Federashon Beisbòl Kòrsou (Febeko) a kontinuá ayera ku e kampionato den Stadion Johnny Vrutaal na Rif, Otrobanda.
Nèt un siman pasá -djaluna 6 di mei- ku Marchena Braves a kibra e invikto Sta Maria Pirates, awor ta e Skòrpiunnan a gana dje kampion. For dje di dos inen e tim a skor 5 kareda i a defendé e ventaha te final.
Picher Ramses Jamanika i bateadó Ryan Ilario tabata esnan ku a sobresalí mas tantu pa Royal Scorpions. Jamanika den 7.1 inen di trabou riba montíkulo a pèrmití 2 kareda riba 4 hit. Ela duna 1 ‘base por bola’ i a ponchá 4 Pirata. Cerilio Soleana a relevá den di 8 inen i no a pèrmití ni kareda ni hit na Sta Maria, aunke ku ela duna wèl 1 ‘base por bola’.
Dos dje sinku karedanan di Royal Scorpions tabata danki na hitnan di Ilario ku a kaba wega ku 2 hit den 3 turno. Un dje batasonan tabata un doblete, miéntras ku ela skor un biaha tambe.
Pa Sta Maria Pirates a pèrdè e wega picher Evenon Martis ku a dura apenas 1,1 inen. Ela pèrmití 5 kareda riba 2 hit i dje karedanan 3 tabata limpi. Mas aleu ela duna 3 ‘base por bola’.
Alexander Rodriguez tabata e mihó bateadó pa Sta Maria. Ela dal 1 hit den 3 turno i a empuhá 1 kareda i skor tambe 1 biaha. Bertrand Peters ku a dal 1 hit den 4 turno a sòru pa e otro kareda Pirata.
E kompetensia ta sigui awenochi, djamars 14 di mei, ku e wega entre Marchena Braves i Sta Rosa Indians. Esaki ta kuminsá mitar di 8 den Tio Daou Ballpark.