Sta Maria Pirates Chippie a sigui gana i awe, djadumingu 10 di yüni 2018, a superá Groot Kwartier Stars ku skor pèrtá di 4-3. E tim di Fire Birds Citizens Insurance tambe a gana awe: 3-1 di Marchena Braves. Ayera djasabra Wild Cats Guardian Group/KJ74 a konsolidá su promé lugá ganando di Sta Rosa Indians: 11-0.
E weganan di beisbòl dòbel A ku a keda hungá den wikènt tabata e último tresnan di buelta number 2. Federashon Besibòl di Kòrsou (Febeko) ta ranka sali mañan djaluna 11 di yüni ku e di 3 buelta.
Wild Cats ayera djasabra a tuma revancha riba Sta Rosa Indians pa e derota ku ela sufri den promé buelta. E kampion di Kòrsou no tabatin kompashon ku e Indjannan: 11-0.
Picher Ruderly Manuel a gana e wega, tirando un asina yamá ’two hitter’. Ela ponchá 6 bateadó den 7 inen di trabou. Rojean Cleofa i Alexander Henrietta tabata e mihó bateadónan. Cleofa a bati 2 hit den 4 turno i a empuhá 3 kareda, miéntras ku Henrietta tambe a dal 2 hit pero den 3 turno i ela empuhá 1 kareda.
Awe djadumingu Sta Maria a sigui ku su racha viktorioso, ora ela gana ku skor di 4-3 di Groot Kwartier Stars. Despues di tabata pèrdí 1-3, e Piratanan a bòltu e skor den di ocho inen anotando 3 kareda: 4-3. E Streanan di Kwartier no tabatin kontesta i a pèrdè despues di tabata ganá.
Gedryon Basilia a resultá e picher ganadó. Ela drenta den di kuater inen di relevo pa picher habridó Ruendy Carolina. Jurgen Statie tabata e mihó bateadó ku 2 hit den 4 turno.
Den e otro wega awe djadumingu Fire Birds a gana ku skor di 3-1 di Marchena Braves. Picher Hendrick Kinburn ku a drenta di relevo den di seis inen a gana e wega. Ela remplasá picher CEdeon Langguth ku a habri riba montíkulo.
Despues di dos buelta Wild Cats ta sigui na promé lugá riba e tabla di posishon ku 11 triunfo i 1 derota. Sta Rosa Indians ta okupá e di dos puesto ku 8 wega ganá i 4 pèrdí. Na di tres lugá ta Sta Maria Pirates ku 7 viktoria i 5 derota, miéntras ku e di kuater puesto ta pa Groot Kwartier Stars ku a gana 6 wega i pèrdè tambe 6 wega.
E di tres buelta ta ranka sali mañan djaluna. Marchena Braves i Wild Cats ta topa otro den Stadion Johnny Vrutaal na Rif, Otrobanda. E enkuentro aki ta kuminsá mitar di 8 anochi.